Skuldsett heimili dýpka og lengja kreppur

Kreppur verða langvinnari og dýpri eftir því sem heimili eru skuldsettari í aðdraganda þeirra. Þetta er meðal þess sem fram kemur í nýrri skýrslu Alþjóðagjaldeyrissjóðsins (AGS) um skuldir heimila. Bornar eru saman skuldakreppur og fall eignaverðs víða um lönd á ólíkum tímum.

Í skýrslu AGS kemur fram að endurfjármögnun banka í fjármálakreppu sé lykilatriði í glímunni við skuldavanda heimila. Í þeim samanburði komi Ísland vel út, til dæmis miðað við Kólumbíu árið 1999 og Ungverjaland í dag.

„AGS klappar íslenskum stjórnvöldum lof í lófa fyrir að hafa brugðist við vanda heimilanna í kjölfar hrunsins með víðtækum almennum aðgerðum sem miðuðust við að draga úr skuldsetningu þeirra og koma í veg fyrir fjöldagjaldþrot og algjört verðhrun á fasteignamarkaði,“ segir í umfjöllun Greiningar Íslandsbanka.

Þó er í skýrslunni bent á að dýpra hafi verið á hvata heimila til að taka með samræmdum hætti þátt í áætlun um endurskipulagningu skuldavandans og afskriftaþörfin hafi aukist eftir því sem lengur var beðið. „Þá segir í skýrslu AGS að skilyrðislaus frestur nauðungarsölu og frysting lána hafi dregið úr hvatanum til að hraða lausn mála og tíðar breytingar á ramma endurskipulagningar skuldavandans hafi ýtt undir væntingar um enn rausnarlegri úrræði,“ segir á vef stjórnarráðsins.- óká