Glitnir lánaði Björgólfi 2.7 milljarða

Glitnir lánaði Björgólfi Guðmundssyni 2,7 milljarða króna án nokkurra veða, að því er fram kemur í stefnu slitastjórnarinnar gegn endurskoðunarfyrirtækinu PWC. Slitastjórnin telur PWC algjörlega hafa brugðist í hlutverki sínu sem endurskoðandi bankans fyrir hrun.

Stefna slitastjórnar Glitnis gegn endurskoðunarfyrirtækinu PWC var lögð fram í Héraðsdómi Reykjavíkur við þingfestingu 12. apríl sl. en í henni er nákvæmlega rakið hvernig endurskoðunarfyrirtækið á að hafa brugðist hlutverki sínu sem endurskoðandi reikninga bankans, að mati slitastjórnarinnar.

Í stefnunni er sagt að stórfelldir ágallar hafi verið á ársreikningum Glitnis fyrir árið 2007 og einnig árshlutauppgjörum 2008. Sérstaklega er tilgreint að lán til stærstu eigenda bankans fyrir hrun hans undir þeirra stjórn, m.a Baugs og FL Group, sem nú heitir Stoðir, hafi verið langt umfram heimildir um stórar áhættuskuldbindingar. Þá kemur einnig fram að bankinn hafi fjármagnað fjórðung af eigin hlutafé, án þess að með nokkrum hætti hefði verið hægt að lesa það út úr ársreikningum.

Slitastjórnin telur að PWC hafi brotið gegn samningsbundinni eftirlitsskyldu með beinlínis rangri endurskoðun. Í stefnunni segir enn fremur að Glitnir hafi lánað Björgólfi Guðmundssyni, fyrrverandi formanni bankaráðs Landsbankans sem nú er gjaldþrota, 2,7 milljarða án veða, en að mati slitastjórnar Glitnis voru útlán stórlega ofmetin í mörgum tilvikum í ársreikningum, og þannig dregin upp staða af banka sem var í traustri stöðu, meðan reyndin var allt önnur.

Málið verður að nýju tekið fyrir í héraðsdómi í júní nk. en þá mun PWC leggja fram gögn í málinu en því er alfarið neitað að hálfu endurskoðunarfyrirtækisins að lög og reglur hafi verið brotnar.