Fjölgun ferðamanna með ólíkindum

Ferðaþjónusta hefur aukist gríðarlega í vetur og fjölgun ferðamanna er með ólíkindum, segir Erna Hauksdóttir, framkvæmdastjóri Samtaka ferðaþjónustunnar. Hún segir að stærsta verkefnið sé eftir se áður að fjölga ferðamönnum utan háannatímans og fá betri nýtingu á alla þá fjárfestingu sem hefur verið ráðist í í tengslum við ferðaþjónustuna. Máli sínu til stuðnings bendir Erna á að 26% aukning hefði orðið á komu ferðamanna í mars.

Erna Hauksdóttir minnti á það, í þættinum Sprengisandi á Bylgjunni, í morgun að ráðist hefði verið í mikilvægt verkefni í fyrra sem var kallað Ísland allt árið. Verkefnið hefði skilað miklu en hún vonaðist til þess að árangurinn yrði áfram góður. Íslandsstofa heldur utan um reksturinn á þessu en við settum peninga í pott, fyrirtækin og stjórnvöld og það er verið að gera mög margt til að vekja athygli umheimsins á því hversu gott Ísland er yfir vetrartímann," sagði Erna.

Erna sagði að búið væri að fjárfesta mikið í ferðaþjónustu að undanförnu. Til dæmis með því að byggja mikið af hótelum og með því að kaupa mikið af bílum og flugvélum. Núna þyrfti að leggja aukið fjármagn í að vernda ferðamannastaði á borð við Gullfoss og fleiri staði sem mikil aðsókn er að.