Ernir flýgur beint til Húsavíkur

Flugfélagið Ernir hefur beint áætlunarflug til Húsavíkur klukkan þrjú í dag og er áætluð lending á Húsavík korter í fjögur. Þetta er fyrsta áætlunarflug frá Reykjavík til Húsavíkur í 12 ár og eru viðtökur heimamanna við fluginu frábærar.

Flogið verður sjö ferðir á viku fjóra daga vikunnar og er það von forsvarsmanna Ernis að hægt verði að gera út flug til Húsavíkur allt árið um kring. Forsvarsmenn Ernis segja að bókanir fari vel af stað og hafi nú þegar nokkur flug fyllst í apríl og maí og bætt hafi verið inn aukaflugum þá daga. Samvinna við ferðaþjónustuna á svæðinu sé góð og líti út fyrir mikinn straum erlendra ferðamann norður með Flugfélaginu Erni, enda hafi svæðið allt í kring upp á mikla möguleika að bjóða.

Húsavík er fimmti áætlunarstaður Flugfélagsins Ernis en fyrir flýgur félagið á Vestmannaeyjar, Höfn í Hornafirði, Bíldudal og Gjögur.