Ríkið að selja Bjálmholt í Rangárþingi ytra

Frestur til þess að skila inn tilboðum í jörðina Bjálmholt í Rangárþingi ytra rennur út klukkan 10:00 17. apríl nk., en Ríkiskaup, fyrir hönd íslenska ríkisins, óskuðu eftir tilboðum í jörðina með auglýsingu í gær.

Á jörðinni er 115,1 fermetra íbúðarhús sem skiptist í kjallara, hæð og ris byggt úr steinsteypu og timbri árið 1930. Ræktað land á jörðinni er 37,3 hektarar en heildarstærð jarðarinnar er u.þ.b. 180 til 200 hektarar, að því er segir í auglýsingu Ríkiskaupa.

Á jörðinni eru einnig útihús, fjárhús og hlöður. Fasteignamat þessarar jarðar er 16,4 milljónir en brunabótamat er 42,4 milljónir króna.

Jörðin er í klukkustundarakstursfjarlægð frá höfuðborgarsvæðinu, og er í auglýsingu sögð „bjóða upp á ýmsa möguleika," en jörðin er í næsta nágrenni við Laugalandsskóla og skammt frá Hellu.

Nánari upplýsingar um jörðina, og söluferlið, má sjá hér.