Flugfreyjufélagi Íslands stefnt fyrir Félagsdóm

Samtök atvinnulífsins hafa fyrir hönd Iceland Express stefnt Flugfreyjufélagi Íslands fyrir Félagsdóm vegna ólögmætrar verkfallsboðunar af hálfu félagsins. Er gert ráð fyrir að niðurstaða Félagsdóms liggi fyrir eftir helgi og því verði engin röskun á starfsemi félagsins.

Vélsleðamaður fór niður um ís

Vélsleðamaður fór niður um ís á Svínavatni á Húnavöllum á fjórða tímanum í dag. Björgunarsveitirnar Blanda á Blönduósi og Strönd á Skagaströnd voru kallaðar út, þar sem óttast var um að maðurinn myndi kólna hratt niður í vatninu. Þó fór betur en á horfiðst og náði maðurinn í land og voru björgunarsveitirnar afturkallaðar um 15 mínútum síðar. Þær fóru þó á staðinn til að reyna að ná sleðanum upp úr vatninu.

Lenti með veikan farþega

Boeing 747 farþegaþota frá flugfélaginu Lufthansa lenti á Keflavíkurflugvelli upp úr klukkan hálf fjögur í dag með veikan farþega um borð. Vélin lagði af stað frá Frankfurt fyrr í dag en hún var á leið til Bandaríkjanna. Farþeganum var komið undir læknishendur í Reykjanesbæ en sjúkrabíll beið eftir honum á flugvellinum. Hann er ekki alvarlega veikur. Flugvélin er farin aftur í loftið og lendi í Bandaríkjunum í kvöld.

Veikindi ekki vegna mengunar

Veikindi hrossa á bænum Kúludalsá í Hvalfirði eru ekki af völdum mengunar iðjuveranna á Grundartanga, er niðurstaða rannsóknar Matvælastofnunar og Tilraunastöðvarinnar á Keldum. Veikindi hrossanna má rekja til efnaskiptaröskunar.

Undirbúa uppsetningu Svanavatnsins

Nemendur Listdansskóla Íslands leggja nú nótt við dag við undirbúning stórsýningarinnar Svanavatnið í Svartaskógi sem flutt verður í Borgarleikhúsinu á mánudag klukkan fimm og átta.

Stefnir í þriðja stjórnsýslustigið

Aukið hlutverk landshlutasamtaka sveitarfélaga í tengslum við yfirtöku verkefna frá ríkinu stefnir í að upp byggist þriðja stjórnsýslustigið á Íslandi, sagði Halldór Halldórsson, formaður Sambands íslenskra sveitarfélaga, á landsþingi sambandsins á föstudag.

Tveir af hverjum þremur vilja nýjan forseta

Tveir af hverjum þremur vilja nýjan forseta á Bessastaði, eða rúm 66 prósent landsmanna. Þetta er niðurstaða nýrrar könnunar Capacent Gallup. Tæplega 34 prósent þeirra sem tóku afstöðu í könnunni vildu helst sjá Ólaf Ragnar Grímsson gegna embætti forseta Íslands áfram.

Perlan verði Náttúruperlan

Hópur fjárfesta sem bauð hæst í Perluna í útboði Orkuveitunnar hefur óskað eftir afstöðu skipulagsráðs til tillögu sem felur í sér tvær viðbyggingar við húsið sem bera muni nafnið Náttúruperlan.

Vélsleðamaðurinn kominn í sjúkrabíl

Vélsleðamaðurinn sem slasaðist sunnan við Hrauneyjalón í Hrauneyjum er kominn í sjúkrabíl. Fimm björgunarsveitarmenn sóttu manninn rétt fyrir hádegi í dag. Hann kvartaði yfir eymslum í baki og samkvæmt upplýsingum frá flugbjörgunarsveitinni verður hann fluttur í bæinn til frekari skoðunar. Maðurinn var í hópi manna þegar snjór hrundi skyndilega undan sleðanum með þeim afleiðingum að hann féll af sleðanum.

Óljóst með makrílinn

Sátt er að nást um nýtt frumvarp um stjórn fiskveiða en frumvarp Steingríms J. Sigfússonar, sjávarútvegsráðherra, var rætt og samþykkt í ríkisstjórn í gær. Enn er togast á um einstök atriði milli stjórnarflokkanna; hlutfall afla í leigupotti og hvernig farið verður með aflaheimildir í nýjum tegundum eins og makríl.

Opinn fundur um ímynd bifhjólafólks

Opinn fundur um ímyndarmál bifhjólafólks verður haldinn á Grand hóteli í Reykjavík á þriðjudaginn næstkomandi. Á vefsíðu bifhjólasamtakanna Sniglanna, segir að tilurð fundarins sé sú umræða sem skapast hefur í samfélaginu að undanförnu og tengir bifhjól og bifhjólamenningu við skipulagða glæpastarfsemi.

Jóhanna um olíusamráðsdóminn: Þetta kom okkur á óvart

Forsætisráðherra segir ákvörðun Héraðsdóms um að fella úr gildi sektargreiðslur vegna olíusamráðsins koma sér á óvart. Íslenska ríkið þarf að greiða olíufélögunum einn og hálfan milljarð króna.

Skiptir máli að kona verði næsti biskup

Það skiptir máli að kona verði næsti biskup Íslands bæði vegna ásýndar kirkjunnar og jafnréttisstefnu. Þetta segir Agnes Sigurðardóttir prestur í Bolungarvík sem hlaut flest atkvæði í fyrri umferð biskuskjörsins í gær.

Sækja slasaðan vélsleðamann

Fimm björgunarsveitarmenn frá Flugbjörgunarsveitinni á Hellu eru nú á leið inn að Hrauneyjum til þess að ná í slasaðan vélsleðamann. Ekki er talið að hann sé alvarlega slasaður en sjúkrabíll hefur verið settur í viðbragðsstöðu. Vélsleðamaðurinn er staddur sunnan við Hrauneyjalón, samkvæmt upplýsingum frá flugbjörgunarsveitinni.

Kynna réttindi fatlaðra um land allt

Sjö einstaklingar hafa frá síðasta sumri gegnt stöðu sendiherra samnings Sameinuðu þjóðanna um réttindi fatlaðs fólks hér á landi og hafa gert víðreist.

Þjófar fótgangandi með flatskjá

Tveir menn stálu flatskjá úr versluninni Nettó í Mjóddinni á áttunda tímanum í gærkvöldi. Lögreglan fékk tilkynningu um að mennirnir væru fótgangandi á leið í Kópavog og voru handteknir stuttu síðar á Smiðjuvegi. Þeir voru vistaðir í fangageymslu á meðan mál þeirra var rannsakað en var svo sleppt að lokinni skýrslutöku.

Líkamsárás í heimahúsi

Maður handtekinn í heimahúsi í austurborginni grunaður um líkamsárás. Hann er enn í fangageymslu en sökum áfengisvímu var ekki hægt að yfirheyra hann í nótt. Það verður gert þegar líða tekur á daginn.

Ölvaður maður datt af hestbaki - hrækti blóði á vegfaranda

Lögreglan á höfuðborgarsvæðinu fékk í nótt tilkynningu um ölvaðan mann á hesti á Vesturlandsvegi við Öskju en sá hafði dottið af baki. Vegfarandi bauð fram aðstoð sína en ekki vildi betur til en svo að maðurinn hrækti blóði á þann hjálpsama. Hinn ölvaði var fluttur á slysadeild til blóðsýnatöku og aðhlynningar en þangað var vegfarandinn, sem ætlaði að hjálpa, einnig fluttur þar sem blóðið fór í munn hans.

Eldur í bíl á Akureyri

Lögreglan á Akureyri var kölluð til á þriðja tímanum í nótt þegar það kviknaði í bíl í bænum. Þegar hún kom á svæðið stóðu eldtungur upp úr bílnum en hann er gjörónýtur. Ekki er ljóst hver eldsupptök voru en bílinn hafði staðið óheyfður frá því á miðnætti.

Banaslys í Hrútafirði

Banaslys varð í Hrútafirði síðdegis í gær. Karlmaður á þrítugsaldri lét lífið þegar bíll sem hann ók valt. Lögreglan á Akureyri fer með rannsókn slyssins.

Fullyrtu að lánið til Kaupþings væri traust - fréttaskýring

Seðlabanki Íslands lánaði Kaupþingi 500 milljón evrur, um 80 milljarða króna, 6. október 2008. Mikill flýtir var við afgreiðslu lánsins en með því átti að reyna að bjarga lausafjárþurrð Kaupþings. Nær allur gjaldeyrisvaraforði Seðlabankans fór í lánið, en Kaupþing féll engu að síður nokkrum dögum síðar. Kaupþing lagði hlutabréf sín í danska bankanum FIH sem veð, en lán Seðlabankans var veitt til fjögurra daga.

Konurnar hafa ekki allar efni á aðgerð

Ekki hafa allar þær konur sem eru með PIP-púða í brjóstum sínum efni á því að láta fjarlægja púðana á Landspítalanum. Þetta segir Saga Ýrr Jónsdóttir, lögfræðingur kvennanna.

Óvissu um kvótakerfið verður að ljúka

Framkvæmdastjóri Slippsins á Akureyri segir að óvissan um kvótakerfið gangi ekki lengur. Stjórnmálamenn verði að fara að ljúka málinu. Hann vonast jafnframt til að stóriðjuframkvæmdir í Þingeyjarsýslum skapi fyrirtækinu veruleg verkefni.

Vigdís brosir út að eyrum vegna netkönnunar

„Þessar niðurstöður eru bara glæsilegar og ég brosi hérna út að eyrum," sagði Vigdís Hauksdóttir, þingmaður Framsóknarflokksins, í viðtali við Reykjavík síðdegis í dag þegar í ljós kom hver niðurstaða könnunar þáttarins sem lesendur Vísis taka þátt í var.

Úraræninginn samþykkti framsal frá Sviss

Hæstiréttur Íslands staðfesti gæsluvarðhaldsúrskurð yfir pólskum karlmanni sem var framseldur hingað til lands frá Sviss vegna úraránsins í Michelsen. Maðurinn hefur játað brotið.

Vilja skattafslætti fyrir tölvuleikjaiðnað á Íslandi

Bretar hafa ákveðið að veita tölvuleikjaiðnaðinum þar í landi umtalsverða skattafslætti. Þrýst hefur verið á að koma svipuðu fyrirkomulagi hér á landi og segir framkvæmdastjóri CCP að slíkt hafi áhrif á hvar fyrirtækið ákveður að stækka við sig í framtíðinni.

Andlegt ástand kvenna með PIP-brjóstapúða slæmt

Lögmaður kvenna sem farið hafa í aðgerð á Landspítalanum til að fjarlæga PIP-brjóstapúða segir andlegt ástand þeirra mjög slæmt. Framkvæmdastjóri lækninga á spítalanum segir greinilegt að gæði púðana er ekki í lagi.

Skoða rammalöggjöf um starfsemi fjármálafyrirtækja

Rammalöggjöf um alla starfsemi íslenskra fjármálafyrirtækja og fjármálastöðugleikaráð er meðal hugmynda sem starfshópur á vegum efnahags- og viðskiptaráðuneytisins mun skoða á næstu mánuðum. Ráðherra vonast til að með slíkum aðgerðum megi styrkja fjármálakerfið og koma í veg fyrir annað hrun.

Kona hugsanlega næsti biskup

Kona gæti orðið næsti biskup Íslands en séra Agnes Sigurðardóttir hlaut flest atkvæði í kosningu um næsta biskup Íslands. Næstur kom doktor Sigurður Árni Þórðarson en kosið verður milli þeirra tveggja í seinni umferð í apríl.

Hafði í hótunum við sýslumann - ætlaði að snúa aftur með byssu

"Þetta var kært til lögreglu,“ segir Þórólfur Halldórsson, sýslumaður í Keflavík, en maður á miðjum aldri kom á skrifstofu sýslumanns um klukkan hálf tvö í dag og hafði í hótunum við sýslumanninn. Meðal annars hótaði maðurinn að snúa aftur á skrifstofuna vopnaður byssu.

Sigurður Árni og Agnes efst

Agnes Sigurðardóttir prestur í Bolungarvík og Sigurður Árni Þórðarson, prestur í Neskirkju, urðu efst í biskupskjörinu þegar úrslit lágu fyrir í fyrri umferð kjörsins. Atkvæði voru talin í dag. Alls höfðu átta manns gefið kost á sér í embættið. Síðari umferð kosninganna mun fara fram í apríl. Gert er ráð fyrir að atkvæði verði talin 20. apríl.

Ögmundur vinsæll hjá framsóknar- og sjálfstæðismönnum

Rúmlega helmingur flokksmanna Vg eru ánægðir með störf Ögmundar Jónassonar, innanríkisráðherra, eða 55 prósent samkvæmt nýjum Þjóðarpúlsi Gallup.

Vinstri grænir ánægðir með Steingrím

Rösklega 80% kjósenda Vinstri grænna eru ánægðir með störf Steingríms J. Sigfússonar, formanns flokksins, samkvæmt nýjum Þjóðarpúlsi Gallup. Ánægja með hann á meðal kjósenda flokksins hefur lítið breyst frá því að minnihlutastjórn Samfylkingarinnar og VG tók við í febrúar 2009.

Kynnti skýrslu um framtíðarskipan fjármálakerfisins

Steingrímur J. Sigfússon, Efnahags- og viðskiptaráðherra, kynnti á ríksstjórnarfundi í morgun skýrslu sína til Alþingis um framtíðarskipan íslenska fjármálakerfisins og opinbert eftirlit með því. Í tilkynningu frá ráðuneytinu segir að fjármálakreppa síðustu fjögurra ára hafi leitt í ljós ýmsa vankanta og veilur á fjármálakerfinu "og jafnframt vakið upp margvíslegar siðferðilegar og pólitískar spurningar sem takast verður á við og svara, eigi að takast að endurreisa traust almennings til banka og fjármálamarkaða. Af þessum sökum er þörf fyrir gagngerar endurbætur á umgjörð og skipan fjármálakerfisins víða um lönd. Ísland er hér engin undanteking. Allar götur frá bankahruninu haustið 2008 hafa breytingar á lagaumgjörðinni um fjármálastarfsemi á Íslandi verið til umræðu.“

Bongóblíða um helgina

Hitinn nær fimmtán stigum á Seyðisfirði í dag og á Neskaupstað er hann 14,7 gráður. Það má því segja að það sé bongóblíða í dag á Austfjörðum. Á hálendinu er líka mikill hiti. Á Möðrudal er 10,7 gráðu hiti.

Glitnismenn áfrýja til Hæstaréttar

Úrskurður Héraðsdóms Reykjavíkur, frá því í dag, í máli sérstaks saksóknara gegn Lárusi Welding og Guðmundi Hjaltasyni hefur verið kærður til Hæstaréttar. Þetta staðfestir Þórður Bogason hæstaréttarlögmaður og verjandi Guðmundar í samtali við Vísi. Hann vildi að öðru leyti ekki láta hafa neitt eftir sér um málið.

Einar Boom segist hættur í Vítisenglum

Einar Ingi Marteinsson, Einar Boom, er hættur í Hells Angels. Samkvæmt frásögn á DV.is hringdi Einar úr gæsluvarðhaldi í ritstjórn DV til að greina frá þessu. "Ég er hættur í Hells Angels. Ég ætla ekkert að ræða það frekar, en ég er hættur og þetta er staðfest," er haft eftir Einari og segir ástæðuna fyrir brotthvarfi hans verða opinberaða síðar. Aðspurður segir Einar það vera skrítið að vera skilinn við samtökin en hann segir að þannig sé það engu að síður. Einar situr í gæsluvarðhaldi grunaður um aðild að árás á konu um síðustu áramót.

Fanfest vekur athygli víða um heim

Mikið hefur verið dýrðir í Hörpunni frá því að Fanfest hátíðin hófst þar í gær. Rúmlega 1.500 spilarar og aðdáendur EVE Online tölvuleiksins hafa heimsótt tónlistarhúsið. Þá hafa þúsundir fylgst með fyrirlestrum tengdum EVE Online og DUST 514 í gegnum netið.

Össur fundaði með Ashton

Össur Skarphéðinsson, utanríkisráðherra, tók í gær þátt í fundi með Catherine Ashton, yfirmanni utanríkis- og öryggismálastefnu Evrópusambandsins, og starfsbræðrum sínum frá öðrum umsóknarríkjum ESB í Brussel. Í tilkynningu frá utanríkisráðuneytinu segir að þá hafi setið fundinn utanríkisráðherrar "formennskuþríeykis sambandsins sem og ráðherrar nokkurra annarra aðildarríkja þess.“

Dorrit með ADHD og lesblindu

Dorrit Moussieff forsetafrú er með lesblindu og AD/HD. Frá þessu greinir hún í samtali við Verzlunarskólablaðið. Ítarlegt viðtal er við Dorrit í blaðinu. Þar er hún meðal annars spurð að því hvort hún hafi gengið í skóla sem barn.

Sérstakur saksóknari þarf ekki að láta upptökur af hendi

Héraðsdómur Reykjavíkur hafnaði í dag kröfu verjenda Lárusar Welding og Guðmundar Hjaltasonar, fyrrum Glitnismanna, að sérstakur saksóknari afhendi þeim geisladiska með mynd- og hljóðupptökum af skýrslutökum yfir þeim. Þeir Lárus og Guðmundur hafa verið ákærðir fyrir umboðssvik vegna lánveitinga til Milestone.

Talning í biskupskosningunum hafin

Kjörnefnd kom saman á Dómkirkjuloftinu klukkan eitt í dag til að telja atkvæðin í fyrstu umferð biskupskosninganna. Kosið var í póstkosningu. Kjörnefnd byrjar á því að fara yfir umslögin sem borist hafa. Um klukkan fjögur í dag verður svo byrjað að telja sjálf atkvæðin. Búist er við því að úrslitin sjálf liggi svo fyrir á sjötta timanum.

Sigmaður gæslunnar fékk í sig straum

Sá óvenjulegi atburður varð við æfingar hjá Landhelgisgæslunni á dögunum að mikið stöðurafmagn myndaðist þegar þyrla var við æfingar á ytri höfn Reykjavíkur í röku lofti og hundslappadrífu. Á heimasíðu gæslunnar segir að afar sjaldgæft sé að svo mikið stöðurafmagn myndist en það þekkist þó í ákveðnum veðurfarslegum skilyrðum þrátt fyrir jarðtengivír sem notaður er til varnar þessum aðstæðum.

Breytingar á tíðnisviði gætu kostað rekstraraðila hundruð milljóna

Breytingar Póst- og fjarskiptastofnunar á tíðinisviði, sem lengi hefur verið notað undir þráðlausa hljóðnema og annan hljóðbúnað, gætu kostað útsendingaraðila og leikhús mörg hundruð milljónir. Rekstraraðilar þurfa því að greiða fyrir endurstillingi hljóðbúnaðarins eða kaupa nýjan.

Þarf meira en 50% atkvæða

Biskupsefni þarf meira en 50% atkvæða til þess að hljóta kjör, samkvæmt upplýsingum frá biskupsstofu. Talning atkvæða í fyrstu umferð kjörsins fer fram í dag og hefst klukkan eitt. Átta manns eru í kjöri og er gert ráð fyrir því að ef enginn þeirra fær meira en helming atkvæða gætu ný kjörgögn farið út 2. apríl, þeim yrði skilað 16. apríl og talið yrði 20. apríl.