Metár í útgáfu atvinnuleyfa

Aldrei áður í sögunni hafa verið gefin út jafnmörg atvinnuleyfi hér á landi og það sem af er þessu ári. Morgunblaðið greinir frá því í dag að útgefin atvinnuleyfi séu nú orðinn rúmlega 4800 á þessu ári, en til samanburðar voru gefin út rúmlega 3700 atvinnuleyfi allt árið í fyrra.

Aðalmeðferð í Baugsmálinu ákveðin í dag

Taka á fyrir þau átta ákæruatriði sem eftir standa í Baugsmálinu í dag og verður aðalmeðferð í málinu væntanlega ákveðin í dag. Fyrirtakan nú er sú fyrsta frá því hæstiréttur ákvað að vísa 32 af 40 ákæruliðum á hendur forsvarsmönnum Baugs og endurskoðendum frá dómi í haust.

Forystumenn ASÍ og Samtaka atvinnulífsins funda eftir hádegi

Ákveðið hefur verið að svonefnd forsendunefnd Samtaka atvinnulífisins og ASÍ komi enn saman eftir hádegi í dag eftir fundahöld um helgina.

CIA reyndi að leyna dauða fanga í Abu Ghraib

Bandaríska leyniþjónustan CIA reyndi að leyna dauða írasks fanga í Abu Ghraib fangelsinu í Írak. Segir fréttatímaritið Time að meðal skjala, sem það hafi fengið um málið, séu myndir sem sýni limlest lík mannsins sem síðan var settur í frysti.

Kviknaði í bíl

Eldur kviknaði í jeppa þegar honum var ekið upp vestanvert Víkurskarðið í nótt, en ökumaður, sem var einn í bílnum, slapp ómeiddur. Þegar bíllinn missti afl, nam ökumaðurinn staðar og ætlaði að kíkja á vélina, en þá gaus eldurinn á móti honum. Ekki varð við neitt ráðið og var bíllinn alelda þegar lögregla og slökkvilið komu frá Akureyri. Kranabíll fjarlægði flakið en ekki er vitað um eldsupptök.

Ölóðir menn í Keflavík

Lögreglan í Keflavík þurfti að taka tvo ölóða menn úr umferð á krá í bænum í nótt , eftir að þeir tóku að berja hvorn annan. Annar þurfti læknishjálp eftir ósköpin. Lögreglan á Akureyri þurfti líka að taka tvo ölvaða menn eftir að þeir fóru að berja veitingastað að utan, en þeim hafði verið hent þaðan út. Lögreglumönnum víða um land finnst nú komið eftir óvenju erilssama helgi vegna ofneyslu áfengis og fíkniefna.

Fæddist í Ártúnsbrekkunni

Lítilli telpu lá svo á í heiminn í nótt að hún yfirgaf móðurkvið í skyndingu, þegar verið var að flytja móðurina í sjúkrabíl á fæðingardeildina við Landsspítalann. Sjúkarbíllinn var þá neðst í Ártúnsbrekkunni og tóku sjúkraflutnignamenn og faðirinn á móti stúlkunni, auk þess sem lögregla kom til aðstoðar. Að sögn lögreglu heilsast móður og dóttur vel.

Kárahnjúkavirkjun sögð vera meðal sex verstu virkjanna heims

Kárahnjúkavirkjun er meðal sex verstu virkjanna heims, með tillliti til náttúruspjalla og félagslegrar röskunar, að mati umhverfissamtakanna World Wildlife fund.

Um sextíu börn bíða eftir leikskólaplássi

Enn vantar um 68 starfsmenn á leikskóla höfuðborgarsvæðisins og um 60 börn bíða eftir leikskólaplássi. Formaður Félags leikskólakennara segir vandann liggja í launakjörum sem augljóslega þurfi að bæta. Vandinn er mestur í Breiðholtinu.

Aldraðir geti búið út af fyrir sig

"Við höfum lagt allt of mikla áherslu á það að aldraðir búi á stofnunum en of litla áherslu á það að aldraðir geti búið í sínu eigin húsnæði og fengið þjónustu þar," sagði Halldór Ásgrímsson, forsætisráðherra og formaður Framsóknarflokksins, á miðstjórnarfundi í Kópavogi á föstudag.

Byrgið vill kaupa Ljósafossskóla

"Við höfum lagt inn tilboð í Ljósafossskóla en ég held að það sé búið að yfirbjóða okkur," segir Guðmundur Jónsson forstöðumaður Byrgisins. Allri starfsemi var hætt í Ljósafossskóla í Grímsnesi í fyrravor og hún flutt í Minni-Borg. Samanlagt er húsnæðið 1.200 fermetrar og er þar með talið íþróttahús.

Reykt kengúra og strútur í boði

Veitingastaðurinn Narfeyrarstofa í Stykkishólmi ætlar að bjóða upp á kengúru, dádýr og lynghænu á fjögurra rétta matseðli í stað hefðbundins jólahlaðborðs á aðventunni.

Hafa áhyggjur af litlu fylgi

Framsóknarmenn hafa áhyggjur af stöðu flokksins samkvæmt skoðanakönnunum. Þetta kom fram á eftir ræðu formanns á miðstjórnarfundi Framsóknarflokksins á föstudag. Flokkurinn mælist með aðeins þriggja prósenta fylgi í borginni en þyrfti um 10 prósent til að koma manni inn.

Minnka má eldsneytisflutninga

Hægt væri að minnka eldsneytisflutninga um höfuðborgarsvæðið um 130 þúsund tonn á ári með því að nýta olíubirgðarstöðina í Helguvík undir flugvélaeldsneyti. Minnstu munaði að rýma þyrfti hluta Hafnarfjarðar nýverið þegar tengivagn með flugvélaeldsneyti losnaði frá olíuflutningabíl.

Íbúðalánasjóður hækki vextina líka

Guði sé lof fyrir vaxtahækkunina, segir Einar K. Guðfinnsson sjávarútvegsráðherra í pistli á heimasíðu sinni og vísar þar til þess að Landsbanki Íslands hækkaði vexti á íbúðalánum síðasta föstudag.

Freista þess að ná samkomulagi

Fulltrúar í forsendunefnd Samtaka atvinnulífsins og Alþýðusambands Íslands komu saman til fundar klukkan tvo í dag til að fara yfir stöðuna í kjaramálum.

Mótsagnakenndar klisjur

Yfirlýsingar formanns Samfylkingar um að íhaldsmenn og frjálshyggjumenn reyni að skreyta sig fjöðrum jafnaðarmennsku eru mótsagnakenndar og klisjukenndar segir þingflokksformaður Sjálfstæðisflokksins.

Heldur upp á 105 ára afmæli sitt

Elsti karlmaður Íslands heldur upp afmæli sitt í dag. Hann er 105 ára. Það er Guðmundur Daðason, sem hefur á stundum verið nefndur elsti Framsóknarmaður í heimi. Guðmundur var áður bóndi á Ósi á Skógarströnd en býr nú á dvalarheimilinu Holtsbúð í Garðabæ.

Baugur kaupir skartgripaverslanir

Baugur Group er að ganga frá kaupum á breskri verslunarkeðju sem rekur á fjórða tug skartgripaverslana undir nafninu Mappin & Webb og Watches of Switzerland.

Varað við ferðalögum

Vegagerðin varar fólk við því að vera á ferð á Möðrudalsöræfum. Þar er hvasst og flughált þannig að lítið má út af bera ef ekki á illa að fara. Flughált er víða um land og því ástæða til að hafa aðgát þegar fólk er á ferð.

Litlu munaði á efstu mönnum

Ómar Stefánsson bæjarfulltrúi hrósaði sigri í prófkjöri Framsóknarmanna í Kópavogi sem fram fór í gær. Sigur hans var þó naumur því aðeins munaði sjötíu atkvæðum á honum og Samúel Erni Erlingssyni sem lenti í öðru sæti.

Flug að hefjast á ný

Ekkert hefur var flogið innanlands í morgun vegna veðurs. Veðurstofan gaf út viðvörun um ísingu yfir landinu og því seinkaði fjórum ferðum í morgun. Nú er hins vegar að rofa til og flugið að hefjast.

Flughált á vegum úti

Flughált er á Mývatnsheiði, Mývatnsöræfum, Möðrudalsöræfum, Vopnafjarðarheiði og á Mýrdalssandi, samkvæmt upplýsingum frá Vegagerðinni. Hálka eða hálkublettir eru á Suðurlandi, Vesturlandi og á Norðurlandi. Hálka, snjóþekja og éljagangur víða á Vestfjörðum, Norðaustur og Austurlandi, og er mokstur þar hafinn. Öxi er ófær.

Tveir stútar lentu í árekstri

Erilsamt var hjá lögreglunni í Reykjavík. Lögregluþjónar þurftu að hafa afskipti af fimm minniháttar líkamsárásum og sex voru teknir vegna ölvunaraksturs. Tveir þeirra höfðu endað ferð sína á því að lenda í árekstri. Þar fór þó betur en svo að nokkur meiddist.

Tvær bílveltur fyrir norðan

Lögreglan á Akureyri var kölluð af stað vegna tveggja bílveltna síðustu nótt. Bíll valt á Öxnadalsheiði um þrjúleytið í nótt og annar í Fnjóskadal um sexleytið í morgun. Enginn slasaðist í bílveltunum tveimur en bílarnir skemmdust eitthvað.

Þrír gistu fangaklefa

Þrír gistu fangaklefa lögreglunnar í Reykjanesbæ, tveir vegna slagsmála en einn vegna ölvunar. Lögreglan var tvívegis kölluð að sama skemmtistaðnum vegna áfloga og handtók einn mann en honum var sleppt skömmu síðar.

Flug liggur niðri

Ekkert hefur verið flogið innanlands vegna veðurs það sem af er morgni. Veðurstofan gaf út viðvörun um ísingu yfir landinu og því frestast það flug sem hafði verið áætlað. Næst á að athuga með flug klukkan ellefu samkvæmt upplýsingum frá Flugfélagi Íslands.

Ófært á Öxi og víða hálka

Öxi er ófær og víða er hált á vegum þannig að vegfarendum er hollt að fara varlega. Hálka eða hálkublettir eru á Suðurlandi, Vesturlandi og á Norðurlandi. Hálka, snjóþekja og éljagangur er víða á Vestfjörðum, Norðaustur- og Austurlandi, og er mokstur þar hafinn.

Réðist á lögreglumenn með skóflu

Tveir fengu að gista fangaklefa lögreglunnar á Ísafirði eftir dansleik á Bolungarvík, báðir vegna slagsmála. Annar var ekki reiðubúinn að hlýða þegar lögregla ætlaði að stöðva hann heldur réðist hann að lögreglumönnum vopnaður skóflu.

Ómar leiðir listann

Ómar Stefánsson leiðir lista Framsóknarflokksins í Kópavogi fyrir bæjarstjórnarkosningarnar næsta vor. Hann bar sigur úr býtum í prófkjöri Framsóknarflokksins í gær og hlaut 666 atkvæði í fyrsta sæti listans. 2.556 greiddu atkvæði. Ómar er eini sitjandi bæjarfulltrúi flokksins sem gaf kost á sér í prófkjörinu.

Ómar Stefánsson leiðir í prófkjöri Framsóknarmanna

Ómar Stefánsson leiðir í prófkjöri Framsóknarmanna í Kópavogi þegar búið er að telja 720 atkvæði af tvöþúsund. Samúel Örn Erlingsson kemur næstur Ómari í baráttunni um efsta sætið og Una María Óskarsdóttir kemur næst honum.

Gelda á útigangandi fressketti

Kattaeigendur í Reykjavík þurfa að láta örmerkja ketti sína og gelda fress eldri en sex mánaða eigi þeir að fá að fara út. Þetta hefur verið samþykkt í borgarráði.

Blóðbankinn í of smáu húsnæði

Starfsmenn Blóðbankans þurfa að sýna mikla útsjónarsemi við störf sín og jafnvel að skáskjóta sér, því húsnæði bankans er fyrir löngu orðið allt of lítið. Tillögur að viðbyggingu liggja fyrir, en ákvörðunar stjórnvalda er beðið.

Segir frjálshyggjuna á undanhaldi

Ingibjörg Sólrún Gísladóttir, formaður Samfylkingarinnar, segir frjálshyggjuna á hröðu undanhaldi út um allan heim og líka á Íslandi. Á Flokksstjórnarfundi í dag deildi hún hart á Sjálfstæðismenn og sagði þá ekki hafa verið brautryðjendur í íslenskum stjónmálum í áratugi.

Mikil uppbygging í Reykjanesbæ

Sjötíu til eitthundrað ný störf verða til árlega, næstu tíu árin, á alþjóðaflugvellinum í Keflavík. Fjöldi íbúða er í byggingu í Reykjanesbæ, og bæjarbúum hefur fjölgað um þrjú prósent það sem af er árinu.

Eftirlitsnefndin virkar ekki sem skyldi

Eftirlitsnefnd fasteignasala er bara pappírstígrisdýr, sem slær á puttana á lögbrjótum og segir skamm, þrátt fyrir að brotin séu mjög alvarleg, segir formaður Húseigendafélagsins. Félag fasteignasala hefur leitað til dómsmálaráðuneytisins vegna þess hve nefndin vinnur hægt og tekur lítt á málum.

Dregur úr virkni undir Mýrdalsjökli

Þrjár eldstöðvar hafa að undanförnu sýnt merki sem gætu verið undanfari umbrota; Hekla, Bárðarbunga og neðansjávareldstöð austan Grímseyjar. Hins vegar hefur Katla róast mjög og verulega hefur dregið úr skjálftavirkni og þenslu undir Mýrdalsjökli.

Annar fundur boðaður á morgun

Fundi forsendunefndar samtaka launamanna og atvinnurekenda lauk um fimmleytið í dag. Að sögn Ara Edwald framkvæmdastjóra Samtaka atvinnulífsins er ekki hægt að greina að svo stöddu frá því sem fram fór á fundinum en boðað hefur verið til annars fundar á morgun klukkan tvö.

Skilgreina pólitísku miðjuna

Framsóknarmenn vilja fara yfir og skilgreina hvað felst í hugtakinu pólitísk miðja, ekki síst í ljósi þess að bæði Samfylking og Sjálfstæðisflokkur sækja nú inn á miðjuna. Ályktun þessa efnis var samþykkt undir lok miðstjórnarfundar Framsóknarflokksins sem lauk um klukkan fjögur.

Góð þátttaka í prófkjöri Framsóknar

Um tólfhundruð manns höfðu kosið í prófkjöri Framsóknarmanna nú klukkan fjögur en kjörstaðir eru opnir til átta í kvöld. Haukur Ingibergsson formaður kjörstjórnar sagði kjörsókn hafa verið jafna og þétta í allan dag. Um opið prófkjör er að ræða og geta allir þeir sem eru á kjörskrá í Kópavogi tekið þátt. Kjörfundur fer fram í Smáraskóla í Kópavogi.

Telja sig hafa sett heimsmet

"Við erum bjartsýn á að þetta hafi tekist," sagði Kristján B. Jónasson, þróunarstjóri hjá Eddu útgáfu, sem stýrði tilraun til að setja heimsmet í Smáralind rétt í þessu. Þá var reynt að setja heimsmet í fjölda fólks sem leikur sér með jójó í einu.

Eyddu tundurdufli sem kom í veiðarfæri

Sprengjusérfræðingar Landhelgisgæslunnar eyddu í gærkvöldi tundurdufli sem kom í veiðarfæri togarans Þórunnar Sveinsdóttur frá Vestmannaeyjum í gær.

Bíllinn ekki vanbúinn

Það er alrangt að sementsflutningabíll fyrirtækisins sem valt við Egilsstaði fyrr í vikunni hafi á nokkurn hátt verið vanbúinn til vetraraksturs, segir Þorsteinn Víglundsson, framkvæmdastjóri BM Vallár, og gerir athugasemd við frétt Stöðvar 2 af veltunni.

Forystan endurkjörin

Ingibjörg R. Guðmundsdóttir var endurkjörin formaður Landssambands íslenskra verslunarmanna á þingi samtakanna sem lauk í dag. Aðrir stjórnarmenn voru einnig endurkjörnir utan þess að Ágúst H. Óskarsson, formaður Verslunarmannafélags Húsavíkur gaf ekki kost á sér til endurkjörs.

Ógelt fress mega ekki ganga laus

Kettir voru fyrirferðamiklir á síðasta fundi borgarráðs. Á fundi borgarráðs voru bæði lögð fram drög að verklagsreglum um handsömun katta og drög að nýrri gjaldskrá um kattahald. Það er skemmst frá því að segja að hvort tveggja var samþykkt samhljóða.