Clinton hafði flugvélaskipti á Keflavíkurflugvelli

Bill Clinton fyrrverandi Bandaríkjaforseti, hafði ör stutta viðdvöl og flugvélaskipti á Keflavíkurflugvelli í morgun, á leið sinni til Færeyja, þar sem hann ætlar að flytja fyrirlestur á ráðstefnu færeyska atvinnulífsins í dag.

Fimmtán manns fórust í sprengingu í Pakistan

Fimmtán manns fórust og að minnsta kosti 20 særðust í sprengingu í norðvestur Pakistan í nótt. Talið er að um sjálfsmorðsárás hafi verið að ræða.

Línubáturinn Signý dregin heim aflvana

Björgunarbáturinn Björg frá Rifi kom seint í gærkvöldi til heimahafnar með línubátinn Signýju HU í togi, eftir að vélin í Signýju bilaði á miðunum í gær. Þá var báturinn um 30 sjómílur suður af Látrabjargi. Tveir menn voru um borð og voru þeir aldrei í hættu, enda var blíðskapar veður á Breiðafirði í gær.

Ísraelar láta lausa 87 palestínska fanga

Ísraelar ætla í dag að leysa úr haldi 87 Palestínumenn. Fangarnir eru allir meðlimir í Fatah hreyfingunni eða stjórnmálahreyfingum sem tengjast henni.

Hross hljóp í veg fyrir bíl

Hross hljóp á bíl á Skagafjarðarbraut skammt frá Blönduósi í gærkvöldi og meiddist það mikið, að grípa þurfti til þess að aflífa það á staðnum. Þrír ungir menn voru í bílnum, en engan þeirra sakaði. Hesturinn stökk á aðra hlið bílsins og féll við það í veginn. Bíllinn skemmdist eitthvað, en var ökufær eftir slysið.-

Forseti Ekvador lýsir yfir sigri í kosningum til stjórnlagaþings

Rafael Correa, forseti Ekvador hefur lýst yfir sigri í kosningum til stjórnlagaþings, sem fóru fram í gær. Ekki er búið að tilkynna um niðurstöður kosninganna en útgönguspár benda til að flokkur Correas fái rúman meirihluta á þinginu. Forsetinn vill að stjórnlagaþingið geri verulegar breytingar á stjórnarháttum í landinu. Andmælendur forsetans segja hins vegar að þær breytingar sem forsetinn hafi í huga verði einungis til þess að auka vald hans. Þrír forsetar hafa ríkt í Ekvador á aðeins 10 árum og ríkisstjórnir þar í landi hafa oft sætt mikilli gagnrýni.

Nýr stjórnarmeirihluti í Úkraínu

Útgönguspár benda til að flokkur Viktors Yushchenko og flokkur Yulia Tymoshenko geti myndað stjórnarmeirihluta í Úkraínu. Kosningar fóru fram í gær. Samkvæmt spám hlaut flokkur Viktors Yanukovych forsætisráðherra tæp 36%. Yushchenko og flokkur Yulia Tymoshenko eru hins vegar með samtals 45% fylgi. Gert er ráð fyrir að Tymoshenko fari fram á stjórnarmyndunarumboð í dag.

Lögreglan rannsakar hópslagsmál

Lögreglan á Húsavík mun í dag halda áfram rannsókn á hópslagsmálum, sme brutust út á veitingastað í bænum í fyrrakvöld með aðild heimananna og erlendra verkamanna. Einn kjálkabrotnaði, annar fótbrotnaði og var fluttur á sjukrahús á Akureyri, og þrír meiddust talsvert og þurftu að leita læknis. Tildrög eru enn óljós og býst lögregla við að kærur verði lagðar fram á báða bóga í dag.-

Enginn augljós sigurvegari í Úkraínu

Kjörstöðum hefur verið lokað í Úkraínu í þriðju þingkosningum í landinu á þremur árum. Útgönguspár segja engan afdráttarlausan sigurvegara. Þær sýna að flokkur forsetans Viktor Yushchenko hafi nauman meirihluta yfir flokki forsætisráðherrans Viktor Yanukovych. Blásið var til kosninganna til að leysa pólitíska deilu á milli mannanna tveggja.

Gyðingar æfir vegna Nazi rúmteppalínunnar

Leiðtogar gyðingasamfélagsins á Indlandi hafa látið í ljós reiði vegna nýrrar rúmteppaalínu sem kölluð er Nazi Collection. Húsgagnafyrirtækið er staðsett í Mumbai og notar hakakrossa í kynningarskyni. Framleiðendurnir segja nafnið standa fyrir New Arrival Zone for India og sé ekki ætlað að láta í ljós gyðingahatur. Gyðingar eru æfir vegna þessa og segjast munu kæra fyrirtækið.

Ragnar klökknaði á Gullna svaninum

Ragnar Bragason kvikmyndaleikstjóri klökknaði þegar tilkynnt var á kvikmyndahátíðinni í Kaupmannahöfn í gærkvöldi að mynd hans Börn hefði verið valin besta mynd hátíðarinnar og hlotið Gullna svaninn.

Heilbrigðiskerfið of flókið

Læknafélagið vill að stofnað verði embætti umboðsmanns sjúklinga sem standi vörð um réttindi þeirra. Heilbrigðiskerfið er of flókið og sjúklingar þekkja ekki réttindi sín segir fyrsti kvenformaðurinn í 90 ára sögu Læknafélagsins.

140 börn á biðlista eftir talþjálfun hjá Talþjálfun Reykjavíkur

Talþjálfun Reykjavíkur hefur sagt upp samningi við Tryggingastofnun. Forsvarsmenn fyrirtækisins harma að trúnaðarbrestur hafi orðið milli þeirra og stofnunarinnar. Um hundrað og fjörutíu börn á öllum aldri eru á biðlista eftir að komast í talþjálfun hjá Talþjálfun Reykjavíkur.

Flugvél í Bónus

Baugur gerir þokkalega vel við þá forstjóra sem standa sig í stykkinu ef marka má frétt í breska blaðinu Telegraph.

Dauðadæmd sjávarpláss

Hátt í tugur sjávarplássa er dauðadæmdur, segir Eiríkur Stefánsson, fyrrverandi formaður Verkalýðs- og sjómannafélags Fáskrúðsfjarðar. Hann er hlynntur því að fólk fái styrk til að flytja frá veikustu byggðunum. Þingmaður Frjálslynda flokksins gagnrýnir að bera eigi fé á fólk til að flytja suður.

Saving Iceland mótmæla í London

Samtökin Saving Iceland hyggja á mótmæli í London gegn ofsóknum íslenskra stjórnvalda gagnvart aðgerðarsinnum samtakanna. Mótmælin munu fara fram á þriðjudag. Samtökin berjast gegn þungri iðnvæðingu á Íslandi. Í yfirlýsingu segir að Ísland reyni að vísa öllum mótmælendum hreyfingarinnar úr landi.

Þrýst á Brown um kosningar

Eftir innan við 100 daga í embætti gæti Gordon Brown forsætisráðherra Breta þurft að taka þá afdrifaríku ákvörðun hvort blása eigi til þingkosninga. Íhaldsmenn hvöttu forsætisráðherrann mjög til þess á flokksþingi sínu í Blackpool í dag. Samkvæmt skoðanakönnunum nýtur Brown mikilla vinsælda og hefur töluvert forskot á David Cameron keppinaut sinn úr Íhaldsflokknum.

Bresk hjón fengu 11 milljón króna símreikning

Breskum hjónum brá heldur betur í brún þegar símreikningur upp á 11 milljónir íslenskra króna datt inn um lúguna hjá þeim. Dawn og Tyrone Chadwich búa í bænum Gronant skammt frá Liverpool. Þegar Dawn opnaði reikninginn kom í ljós að sjö mínútna símtal til Chester, sem er rúmlega fimmtíu kílómetra í burtu, kostaði níu og hálfa milljón, fyrir utan virðisaukaskatt.

Aflvana bátur undan Snæfellsnesi

Línubáturinn Signý HU frá Blönduósi er nú aflvana út af Snæfellsnesi. Tilkynning barst til hafnaryfirvalda á Rifi upp úr klukkan tvö í dag. Björgunarbáturinn Björg frá Rifi fór til aðstoðar og er nú norður undir Bjargi á leið til línubátsins sem liggur 33 sjómílur frá Rifi. Páll Stefánsson skipstjóri Bjargar segist áætla að ná til Signýjar rétt fyrir klukkan fimm.

Búist við sigri Yanukovych í Úkraínu

Búist er við að flokkur Viktors Yushchenkos forseta Úkraínu bíði afhroð í þingkosningunum sem fara fram í landinu í dag. Flokki forsætisráðherrans, Viktors Yanukovych, er hins vegar spáð stærstum hluta atkvæða í útgönguspám.

13 létust í sprengjuárás í Tyrklandi

Tala látinna eftir sprengjuárás í suðausturhluta Tyrklands í gærkvöldi er nú komin í 13 samkvæmt upplýsingum þarlendra embættismanna. Sjö öryggisverðir og fimm borgarar létur lífið og tveir slösuðust í árásinni. Lík sjö ára gamals drengs fannst svo við litla rútu sem uppreisnarmennirnir réðust að. Drengurinn var sonur annars fórnarlambs árásinnar.

Amma fæddi eigin barnabörn

Fimmtíu og eins árs gömul brasilísk kona fæddi tvíbura sem eru hennar eigin barnabörn. Rosinete Serrao var staðgöngumóðir fyrir dóttur sína Claudiu Michelle sem getur ekki átt börn. Tvíburarnir, Antonio Bento og Vitor Gabriel, fæddust heilbrigðir og þurftu enga sérstaka læknisaðstoð. Þetta er fyrsta tilfellið í heiminum þar sem kona gengur með tvíbura sem eru barnabörn hennar.

Ásatrúarmenn blótuðu undir Hafnarfjalli

Vættarblót ásatrúarfélags Íslands var haldið í Hafnarskógi undir Hafnarfjalli í gærkvöldi. Ásatrúarfélagið heldur nokkur blót yfir árið. Á þeim er drukkið við varðeld til heilla guðum og góðum vættum. Drykkjarhorn með mjöði er látið ganga milli manna sem standa við eldinn.

Úkraína - Kosningar leysa ekki stjórnarkreppu

Úkraínumenn gengu til þingkosninga í dag, en skoðanakannanir benda ekki til þess að þær verði til að leysa stjórnarkreppu sem hefur verið í landinu undanfarna mánuði. Forseti Úkraínu, Viktor Jústsénko, greiddi atkvæði með fjölskyldu sinni í morgun. Hann komst til valda í appelsínugulu byltingunni svokölluðu fyrir tæpum þremur árum.

Drápu 12 friðargæsluliða í Darfur

Tólf friðargæsluliðar á vegum Afríkubandalagsins í Darfur í Súdan létust í árás á herbúðir bandalagsins í dag. Tuttugu og fimm manns slösuðust. Þetta er mesta mannfall í röðum friðargæsluliða bandalagsins frá því þeir komu til landsins árið 2003.

Segir þúsundir látna í Mjanmar

Ofursti úr stjórnarhernum í Mjanmar segir að þúsundir manna hafi fallið í árásum hersins á stjórnarandstæðinga undanfarna daga. Norskur blaðamaður, sem er staddur í frumskóginum á landamærum Tælands og Mjanmars, segir að ofurstinn hafi neitað að ráðast á munka og sé nú flúinn með fjölskyldu sína. Hann sækist eftir hæli í Noregi.

Vilja strætó um allan Eyjafjörð

Háskólinn á Akureyri kannar nú grundvöll þess að strætó aki um allan Eyjafjörð. Sveitarstjórnarmenn vilja fá stuðning frá ríkinu í það verkefni. Árið 1999 var flutt tillaga á Alþingi um strætó á Eyjafjarðarsvæðinu en þar búa um 25.000 manns. Málið hlaut ekki hljómgrunn þá, en í millitíðinni hefur ýmislegt breyst. Nemendum hefur meðal annars stórfjölgað við Háskólann á Akureyri.

Mótvægisaðgerðir rothögg fyrir sumar byggðir

Kristinn H. Gunnarsson þingmaður Frjálslyndra furðar sig á því að fólki verði boðinn styrkur af opinberu fé til að flytja ur sjávarplássunum þangað sem atvinnan er - það er, á höfuðborgarsvæðinu. Þetta segir hann í nýjum pistli á heimasíðu sinni. Samþjöppun í sjávarútvegi og fækkun starfa geti orðið svo gott sem rothögg fyrir sumar byggðir, en mótvægisaðgerðirnar séu hvorki fugl né fiskur.

Rekin húshjálp grunuð um rán Madeleine

Breska lögreglan leitar stúlku sem rekin var frá Mark Warner sumarhúsakeðjunni eftir allsérstaka ábendingu frá Karli Bretaprins. Nafnlaus tölvupóstur barst skrifstofu hans þar sem því er haldið fram að Madeleine hafi verið rænt af fyrrum húshjálp Mark Warner keðjunnar í Praia da Luz. Þar segir að stúlkan hafi rænt Madeleine í hefndarskyni fyrir fyrirtækið.

Skjálftar í Kyrrahafi

Snarpur jarðskjálfti varð í Kyrrahafi um 500 kílómetra suðvestur af Nýjasjálandi í morgun en engar fréttir hafa borist af neinum skaða og yfirvöld telja ólíklegt að hann hafi valdið flóðbylgju. Skjálftinn var 7,4 stig.

Anand nýr heimsmeistari í skák

Indverjinn Vishwanathan Anand er nýr heimsmeistari í skák. Hann varð efstur með níu stig á átta manna heimsmeistaramóti sem fram fór í Mexíkóborg.

Kviknaði í fjölbýlishúsi í Reykjavík

Eldur kom upp í fjölbýlishúsi að Nýlendugötu 29 í Reykjavík á fjórða tímanum í nótt. Fimmtán manns og tvö börn voru í húsinu, flestir komust út að sjálfsdáðun, en slökkvilið aðstoðaði aðra. Einn var fluttur á sjúkrahús með minniháttar reykeitrun. Greiðlega gekk að slökkva eldinn sem kom upp í eldhúsi á annarri hæð hússins.

Hoppaði í höfnina á Stokkseyri

Erilsamt var hjá lögreglunni á Selfossi í nótt. Klukkan fjögur var hún kölluð út þar sem kona hafði hoppað í höfnina á Stokkseyri. Ekki er vitað hvað henni gekk til, en henni var bjargað úr sjónum áður en lögregla og sjúkrabíll komu á staðinn.

Dularfullur eldsvoði á Draugabarnum

Klukkan fimm í nótt kviknaði í stól á Draugabarnum á Stokkseyri. Stóllinn var á svölum hússins þegar kviknaði í honum. Engar skýringar eru á því af hverju hann varð alelda, en staðurinn lokaði tveimur klukkustundum áður en kviknaði í. Lögreglumenn sem voru í útkalli við höfnina tóku eftir reyk frá svölunum og könnuðu málið. Engar frekari skemmdir urðu á staðnum, en stóllinn er ónýtur.

Réðist á lögreglumann í Reykjanesbæ

Lögreglumaður í Reykjanesbæ hlaut talsverða áverka í nótt þegar maður réðist á hann á Hafnargötu og kýldi í andlitið. Lögreglumenn voru að leysa upp slagsmál þegar maðurinn réðist á einn þeirra. Árásarmaðurinn er á tvítugsaldri og var undir áhrifum áfengis. Hann var handtekinn og gistir fangageymslur en verður yfirheyrður seinna í dag.

Gambari hitti Suu Kyi í morgun

Sendifulltrúi Sameinuðu þjóðanna í Mjanmar, Ibrahim Gambari, hitti í morgun leiðtoga stjórnarandstöðunnar, sem er í stofufangelsi. Gambari kom til Yangon stærstu borgar Mjanmar í morgun.

Nýsköpunarkeppni grunnskólanemenda á morgun

Úrslit í Nýsköpunarkeppni grunnskólanemenda verða á hátíð sem hefst í Grafarvogskirkju klukkan 15 á morgun. Menntamálaráðherra setur keppnina sem 52 grunnskólar tóku þátt í. Forseti Íslands heldur ræðu og afhendir verðlaunin. Orka og umhverfi verða í fyrirrúmi í keppninni.

Fræðsla um réttindi samkynhneigðra á Íslandi

Jóhanna Sigurðardóttir félagsmálaráðherra og Frosti Jónsson formaður Samtakanna 78 undirrituðu í dag samning um að koma að gerð fræðslubæklings um réttindi samkynhneigðra á Íslandi fyrir útlendinga sem eru búsettir hér á landi.

Kvótaskerðing ekki möguleg í tíð síðustu ríkisstjórnar

Forsætisráðherra segir að ekki hafi verið hægt að grípa til nauðsynlegrar skerðingar veiðiheimilda í tíð síðustu ríkisstjórnar. Eitt það hrikalegasta sem gæti hent Íslendinga væri að missa þorskstofninn og hann ætlaði ekki að láta það gerast í tíð þessarar ríkisstjórnar.

Baráttan á réttri braut

Baráttan við alnæmi er komin á rétta braut í Suður-Afríku. Þetta segir formaður læknafélagsins þar í landi og bætir við að Íslendingar geti lagt margt að mörkum í því verkefni.

Enginn stuðningur við börn sem eru fórnarlömb kynferðisofbeldis

Enginn stuðningur er við börn sem verða fyrir kynferðisofbeldi líkt og fyrir fullorðin fórnarlömb kynferðisbrota, fyrr en búið er að taka af þeim skýrslu fyrir dómi, segir hæstaréttarlögmaður. Brýnt sé að koma á úrræðum sem veiti börnum og foreldrum þeirra stuðning frá upphafi.

Byltingarkennd tilraun

Verulega mætti draga úr koltvísýringsmengun á Íslandi og víðar í heiminum ef tilgátur vísindamanna um bindingu koltvísýrings í jörðu reynast réttar. Sögulegur samningur var undirritaður í Hellisheiðarvirkjun í dag um byltingarkennda tilraun, segir forseti Íslands.

Niðurrif hafið

Niðurrif kjarnorkuvinnslustöðvarinnar í Sellafield á Englandi hófst í dag. Tveir 88 metra háir vatnskæliturnar voru felldir með töluverðu sprengiefni.

Ráðherra burt af þingi

Framsóknarmenn vilja að ráðherrar fái ekki að gegna þingmennsku samfara ráðherrastörfum. Það sé mikilvægt til að styrkja þingræðið í landinu.

Háttsettur al-Kaída liði felldur

Bandarísk hermálayfirvöld segjast hafa fellt háttsettan liðsmann al-Kaída í Írak í vikunni. Írakar segja almenna borgara hafa falliði með honum - því neita Bandaríkjamenn.