Réttað yfir samherjum Saddams

Nokkrir af nánustu samstarfsmönnum Saddams Hussein, fyrrum einræðisherra Íraks, verða dregnir fyrir rétt í næstu viku, sagði Iyad Allawi, forsætisráðherra Íraks í gær.

Treystir Rumsfeld ekki

John McCain, einn áhrifamesti öldungadeildarþingmaður repúblikana, segist ekki bera neitt traust til Donalds Rumsfeld, varnarmálaráðherra Bandaríkjanna, þegar kemur að því að ákveða hvernig haga eigi stríðsrekstri í Írak.

Mistök að grípa til vopna

Það voru mistök hjá Palestínumönnum að grípa til vopna gegn Ísraelum, sagði Mahmoud Abbas, leiðtogi Frelsissamtaka Palestínu, í viðtali við blaðið Asharq al-Awsat, sem gefið er út á arabísku í London. Hann sagði að Palestínumenn ættu að beita sér gegn hernámi Ísraela án þess að grípa til ofbeldis.

Átján tíma í köldum sjó

Áttræðum veiðimanni var bjargað úr sjávarháska eftir að hafa verið átján klukkustundir í sjónum undan Flórída.

Nær fjörutíu létu lífið

38 manns létu lífið þegar tvær indverskar farþegalestir rákust saman í Punjab-héraði í norðurhluta Indlands. Lestirnar voru fyrir mistök á sama járnbrautarspori en hvor á leið í sína áttina og lentu því framan á hvorri annarri.

Sagður hafa viljað beita hernum

Forsætisráðherra Úkraínu þvertekur fyrir að hafa viljað senda herinn til að tvístra mótmælendum í höfuðborginni. Financial Times hefur eftir heimildarmönnum að hann hafi þrýst á forsetann um þetta. </font /></b />

Nýtt segulómstæki tekið í notkun

Nýtt segulómstæki sem kostar litlar hundrað og fimmtíu milljónir var tekið í notkun á Landspítala háskólasjúkrahúsi í dag. Það kemur í stað þrettán ára gamals tækis og er mun öflugra og snarara í snúningum.

Íslensk jól í Danmörku

Um sjö þúsund Íslendingar sem eru búsettir í Danmörku eru ýmist að koma sér til Íslands fyrir jólin eða að bíða eftir að hangikjötið skili sér að heiman.

Spara mætti 240 milljónir á ári

Stjórnendur Flugstöðvar Leifs Eiríkssonar segja margfalt ódýrara að vera með innanlandsflug í Keflavík en í Reykjavík. Taka myndi innan við ár að koma upp aðstöðu fyrir innanlandsflugið á Keflavíkurflugvelli. Hugmyndirnar voru ræddar á fundi með Aflvaka, atvinnuþróunarfélagi Reykjavíkur.

Ráðherra gagnrýnir sofandahátt

Íslendingar hafa meiri skilning á því að gerðar séu ráðstafanir vegna náttúruhamfara en hamfara af manna völdum, að mati Björns Bjarnasonar dómsmálaráðherra.

Heimshorfurnar til umræðu

Geir H. Haarde fjármálaráðherra stýrði 22. ráðsfundi Evrópska efnahagssvæðisins í fjarveru Davíðs Oddssonar utanríkisráðherra í Brussel í gær. EES-ráðið er samráðsvettvangur utanríkisráðherra EES-ríkjanna, þ.e. EFTA-ríkjanna innan EES og Evrópusambandsins, en Ísland lýkur formennsku í ráðinu um áramót.

Nottla gegt gaman

Ekki er víst, og reyndar æði ólíklegt, að allir lesendur skilji fyrirsögnina hér að ofan. Stór hópur á hins vegar auðvelt með að lesa þetta og við honum blasir einfaldlega: "Náttúrlega geðveikt gaman". Fjöldi orða er nú stafsettur á nýstárlegan hátt í samskiptum unga fólksins með fjarskiptatækjum nútímans. </font /></b />

Íslendingar sýna fordæmi

Íslendingar hafa verið beðnir um að kynna vetnisáform stjórnvalda fyrir erlendum þjóðum. Hjálmar Árnason, þingmaður og formaður nefndar um vetnisvæðingu á Íslandi, sat fund orku- og umhverfisnefndar Norðurlandaráðs í Osló í liðinni viku þar sem hann kynnti verkefnið.

Ásókn í störf fyrir Austan

Talsvert er um það að umsækjendur um embættisstörf hjá Fljótsdalshéraði sæki um fleiri en eina stöðu. Einn þeirra sækir um þær allar. Rúmlega sjötíu umsóknir bárust um störfin sjö sem auglýst voru. Flestar voru umsóknirnar um starf menningar- og frístundafulltrúa, átján talsins.

Enn stríðshrjáð tveimur árum eftir lok bardaga

Dag hvern deyja um þúsund íbúar Kongó af ástæðum sem rekja má til stríðsins sem geisaði í landinu á árunum 1998 til 2002. Það hefur kostað 3,8 milljónir manna lífið og nú óttast margir frekari átök. </font /></b />

Gagnrýnir Berlusconi hástöfum

Romano Prodi, sem nýlega lét af embætti forseta framkvæmdastjórnar Evrópusambandsins, stimplar sig á ný inn í stjórnmálalífið á Ítalíu með kraftmikilli gagnrýni á Silvio Berlusconi forsætisráðherra.

Fullkomið hljóðkerfi í Egilsbúð

Samvinnufélag útgerðarmanna í Neskaupstað afhenti í gær Norðfirðingum að gjöf fullkomið hljóðkerfi. Hljóðkerfið hefur verið sett upp í Egilsbúð og notað þar undanfarnar vikur og segir Guðmundur Rafnkell Gíslason, veitingamaður í Egilsbúð, að sennilega sé þetta eitt besta hljóðkerfið á landinu.

Blaðamaður lagði línurnar

Bandarískur blaðamaður fékk tvo hermenn til að spyrja Donald Rumsfeld varnarmálaráðherra út í það hvers vegna farartæki þeirra væru ekki nægilega vel brynvarin. Hann sá líka til þess að spurningum þeirra yrði svarað með því að ræða fyrirfram við liðþjálfa sem valdi þá úr sem fengu að spyrja ráðherrann út úr.

Þrjú ár fyrir morð

Þrítugur bandarískur hermaður, Johnny M. Horne, var í gær dæmdur af bandarískum herdómstól til þriggja ára fangelsisvistar fyrir að myrða alvarlega særðan sextán ára gamlan Íraka í ágúst síðastliðnum.

Silfraður fiðringur í útvegsmönnum

Mælingar norskra fiskifræðinga benda til að fundinn sé gífurlega stór árgangur af norsk-íslenskri síld. Góðæri í hafinu og hækkun sjávarhita við Ísland gefa vonir um að síldin gangi að ströndum landsins og verði þar veiðanleg eftir tvö ár. </font /></b />

Lítil viðbrögð við þráðlausu kerfi

Lítil pólitísk umræða hefur orðið um tilboð fjarskiptafyrirtækisins eMAX sem hefur sagst geta sett upp ódýra lausn á dreifikerfi internetsins fyrir landsbyggðina. Stefán Jóhannesson, framkvæmdastjóri fyrirtækisins, segir að nokkrir þingmenn hafi haft samband við hann þegar fjallað var um fyrirtækið í fjölmiðlum fyrr í vetur til að fá upplýsingar um tæknina sem fyrirtækið notar.

Skólagjöld í skötulíki?

Fyrir skömmu samþykkti meirihluti Alþingis frumvarp sem kveður á um að hækka skráningargjöld við Háskóla Íslands um tæp 40 prósent. Stúdentaráð hefur lengi barist gegn hækkun innritunargjalda og gagnrýndi Dagnýju Jónsdóttur harðlega fyrir að sitja hjá við atkvæðagreiðslu, en ekki greiða atkvæði gegn frumvarpinu.

Árásarmaðurinn í jólasveinabúningi

Fjöldi vitna segir Loft Jens Magnússon hafa greitt hálfsextugum manni þungt hnefahögg í höfuð í fyrrinótt þannig að maðurinn lést hálfum sólarhring síðar. Loftur var klæddur í jólasveinabúning þegar hann gerði árás sína. Maðurinn sem lést hét Ragnar Björnsson. Eiginkona hans og sonur var með honum á skemmtistaðnum Áslák þar sem atlagan var gerð.

Stórtjón í bruna í vélsmiðju

Stórtjón varð í bruna í stórri vélsmiðju að Miðhrauni átta í Garðabæ í nótt. Tveir menn, sem voru við vinnu í smiðjunni þegar eldurinn braust út með skjótum hætti, sluppu ómeiddir út og kölluðu á slökkvilið. Þegar slökkvilið af öllu höfuðborgarsvæðinu kom á vettvang skömmu síðar logaði út um glugga og í þakinu.

Barghouthi hættir við framboðið

Marwan Barghouthi, vinsæll en herskár leiðtogi úr röðum Palestínumanna, hefur ákveðið að hætta við framboð sitt til forseta Palestínu og styðja þess í stað framboð Mahmouds Abbas sem er mun hófsamari. Barghouthi situr í fangelsi í Ísrael fyrir morð og því var með öllu óljóst hvað gerðist, bæri hann sigur úr býtum í kosningunum.

Deilunni vísað til sáttasemjara

Launanefnd leikskólakennara hefur ákveðið að vísa launadeilu sinni við samninganefnd sveitarfélaga til Ríkissáttasemjara í dag þar sem viðræður voru ekki lengur að skila árangri að mati nefndarinnar.

Basescu lýstur sigurvegari

Traian Basescu, fulltrúi stjórnarandstöðunnar í Rúmeníu, hefur verið lýstur sigurvegari í forsetakosningunum í landinu, sem fram fóru í gær, af yfirkjörstjórninnni. Þegar búið var að telja 92% atkvæða nú á tíunda tímanum var hann með 51,75% atkvæða en andstæðingur hans, forsætisráðherrann Adrian Nastase, var með 48,25%.</font /></font />

Ísraelsmenn með hefndarárásir

Ísraelskar herþyrlur skutu í það minnsta sex flugskeytum á skotmörk í Gasa-borg í nótt í hefndarskyni fyrir árás palestínskra hryðjuverkamanna á landamærastöð Ísraelsmanna á mörkum Egyptalands og Gasa-strandarinnar. Fjórir hermenn fórust og tíu særðust í þeirri árás sem er sú mannskæðasta frá því að Jasser Arafat lést.

Lýtaaðgerðadrottningar í Kína

Kínverskar fegurðardrottningar spókuðu sig í almenningsgarði í Peking í morgun að þeirra tíma. Þetta eru þó ekki venjulegar fegurðardrottningar heldur var meginskilyrðið í keppninni að hafa gengist undir lýtaaðgerð.

Slæmt veður víða um land

Slæmt veður er orðið á miðum víða við landið og er spáð versnandi veðri. Aðeins hundrað skip eru enn á sjó, flest stór, og er ekki vitað um óhöpp. Þakplötur fóru að losna af nýbyggingu í Njarðvík seint í gærkvöldi og fuku fjórar á bíl og skemmdu hann.

Framboð til framkvæmdastjóra WTO

Frakkar hafa tilkynnt um framboð Pascals Lamy til framkvæmdastjóra heimsviðskiptastofnunarinnar WTO. Lamy var um hríð viðskiptastjóri Evrópusambandsins og fékk mikið lof fyrir að hafa dregið úr niðurgreiðslustefnu sambandsins.

Olíuverð hækkar í Asíu

Olíuverð hefur hækkað lítillega á mörkuðum í Asíu og morgun í kjölfar þess að Sádi-Arabar ákváðu að minnka það magn sem þeir hyggjast flytja þangað í janúar. Það er í takt við ákvörðun OPEC, samtaka olíuframleiðsluríkja, frá því á föstudag en þá var ákveðið að draga úr olíuframleiðslu á næsta ári til að koma í veg fyrir frekari lækkun olíuverðs.

Ók á hreindýr á Fljótsdalsheiði

Bíl var ekið á fjögur hreindýr þar sem þau voru uppi á veginum á Fljótsdalsheiði í gær og drápust tvö strax. Hin tvö voru svo mikið særð að lögregla þurfti að aflífa þau. Ökumaður bílsins slapp ómeiddur en einhverjar skemmdir urðu á bílnum.

Írakskur Hitler að fæðast?

Írakskur Hitler gæti fæðst haldi óöldin í Írak áfram með niðurlægingu og örvilnun írakskra borgara. Þetta sagði forseti Íraks, Ghazi Yawar, í viðtali við arabískt dagblað í morgun. Hann sagði ástandið sambærilegt við það sem var í Þýskalandi eftir fyrri heimsstyrjöldina, og minnti á að að hefði reynst frjór jarðvegur fyrir Adold Hitler og nasisma.

Flugfarþegum fjölgar um 17,9%

Farþegum í áætlunarflugi Icelandair fjölgaði um 15,1% í október. Þeir voru rúm 110 þúsund í október í ár en 96 þúsund í október í fyrra. Frá áramótum eru farþegar Icelandair tæplega 1.170 þúsund eða 17,92% fleiri en á fyrstu tíu mánuðum síðasta árs. Þetta kemur fram á vef Kauphallarinnar.

13 óbreyttir borgarar fórust

Í það minnsta þrettán fórust og töluverður fjöldi særðist í sjálfsmorðssprengjuárás í Bagdad í morgun, allt óbreyttir borgarar. Bíl ku hafa verið ekið upp að eftirlitsstöð hersins nærri græna svæðinu, þar sem Bandaríkjaher og bráðabirgðastjórn Íraks hafa aðsetur, og hann sprengdur í loft upp.

Jarðir falli í verði vegna smits

Dæmi eru um að jarðaeigendur óttist að jarðir þeirra kunni að falla í verði, ef staðfest er að hræ af militsbrandssýktum dýrum hafi verið urðuð þar. Þá er það nokkuð samdóma álit kunnugra í þessum viðskiptum að framvegis verði að taka sérstaklega fram við sölu á bújörðum ef hræ af miltisbrandssýktum skepnum hafa verið urðuð á jörðinni.

Eyddi gögnum um sprengjuárásina

Ríkisstjórn Jose Maria Aznars eyddi mikilvægum gögnum um atburðina kringum 11. mars þegar hryðjuverkamenn gerðu árásir á lestir í Madríd. Þessu heldur Jose Luis Rodriguez Zapatero, forsætisráðherra Spánar, fram.

Júsjenko heppinn að vera á lífi

Viktor Júsjenko, forsetaframbjóðandi stjórnarandstöðunnar í Úkraínu, kveðst vera heppinn að vera á lífi og krefst rannsóknar á því hvernig hann varð fyrir díoxíneitrun. Saksóknari hefur á ný hafið rannsókn á því hvernig Júsjenko veiktist og afmyndaðist í andliti.

Deilan leysist ekki á næstunni

Björg Bjarnadóttir, formaður Félags leikskólakennara, segist ekki of bjartsýn á að kjaradeila félagsins við sveitarfélögin verði leyst á næstunni. Fulltrúar leikskólakennara og launanefndar sveitarfélaga voru á fundi með ríkissáttasemjara í morgun. 

Stirt á milli Bush og Giulianis

Samskipti George Bush Bandaríkjaforseta og Rudys Giulianis, fyrrverandi borgarstjóra í New York, eru sögð hafa borið skaða af vandræðum í tengslum við skipan nýs heimavarnaráðherra. Bernard Kerik dró sig fyrir helgi í hlé og afþakkaði tilnefningu í embættið í kjölfar þess að upp komst um vandræðamál í fortíð hans en Giuliani er sagður hafa mælt með honum.

Landsframleiðsla jókst um 7,5%

Útflutningur á þjónustu, sem einkum má rekja til aukinna umsvifa íslenskra leiguflugfélaga, á hvað drýgstan þátt í því að landsframleiðsla jókst um tæplega sjö og hálft prósent á þriðja ársfjórðungi sem er mun meiri aukning en á undanförnum ársfjórðungum.

Friðarvonir dofna í kjölfar árása

Vonir um frið í Miðausturlöndum dofnuðu í nótt eftir að palestínskir hryðjuverkamenn gerðu árás á eftirlitsstöð Ísraelshers og herinn svaraði með loftárásum á Gasa-borg.

Fylgni mígrenis og heilablóðfalls

Þeir sem þjást af mígreni eru helmingi líklegri en aðrir til að fá heilablóðfall. Þetta er niðurstaða rannsókna breskra og bandarískra vísindamanna. Átta sinnum meiri líkur eru á að konur sem þjást af mígreni og taka pilluna fái heilablóðfall en aðrir.

Brú yfir Kolgrafarfjörð vígð í dag

Nýr vegur og brú yfir Kolgrafarfjörð á norðanverðu Snæfellsnesi verða formlega opnuð í dag. Brúin sjálf er 230 metrar, og skipar sér í hóp lengstu brúa á landinu, og síðan eru hálfs kílómeters landfyllingar við báða enda. Þar bætast við nýir vegakaflar og tengjast þjóðveginum.