Bellingham braut ísinn og Eng­land vann riðilinn

England vann 0-2 sigur á Panama í lokaleik sínum í L-riðli heimsmeistaramótsins í kvöld. Með sigrinum tryggðu Englendingar sér toppsætið í riðlinum.

Jude Bellingham skoraði fyrra markið á 62. mínútu og lagði það seinna upp fyrir Harry Kane fimm mínútum seinna.

Englendingar ógnuðu lítið í fyrri hálfleik gegn Panamamönnum sem áttu ekki lengur möguleika á að komast upp úr riðlinum.

Staðan í hálfleik var markalaus en fjör færðist í leikinn í seinni hálfleik.

Á 62. mínútu tók Bukayo Saka hornspyrnu og fann Bellingham inni á vítateignum. Hann skoraði með skoti á lofti með vinstri fæti og Englendingar gátu andað léttar.

Fimm mínútum síðar sendi Bellingham boltann fyrir frá vinstri á kollinn á Kane sem skallaði hann í netið. Þetta var ellefta mark hans á heimsmeistaramóti en enginn Englendingur hefur skorað fleiri mörk.

Fátt markvert gerðist það sem eftir lifði leiks og sigur Englands var ekki í hættu.

Næsti leikur Englands er í Atlanta á miðvikudaginn. Mótherjinn þar verður annað hvort Senegal eða Lýðstjórnarlýðveldið Kongó.