Gyða semur tón­list fyrir kvik­mynd Bad Bunny

Kvikmyndin hefur verið í bígerð síðan í byrjun árs 2023 og skrifar René handritið með Alexander Dinelaris Jr. sem er þekktur fyrir samstarf sitt með mexíkóska leikstjóranum Alejandro González Iñárritu. 

Sögusviðið er pólitískt og tilfinningalegt landslag Puerto Rico á 19. öld og fjallar um frelsishetjuna og útlagann José Maldonado Román sem var kallaður El Aguila Blanca eða Hvíti örninn. 

Bad Bunny sem spilaði nýlega á Ofurskálinni og er einn vinsælasti tónlistarmaður heims verður hér í sínu fyrsta aðalhlutverki. Hann hefur áður verið í smærri hlutverkum í myndum á borð við Bullet Train (2022) og Caught Stealing (2025).

Gyða Valtýsdóttir hefur samið tónlist við myndir á borð við Undir halastjörnu (2018) og Missi (2024) og spilað selló í tónlist fyrir myndir á borð við Nickel Boys (2024) og Knock at the Cabin (2023). Þetta verður þó hennar langstærsta kvikmyndaverkefni hennar til þessa.

Gyða er klassískt menntaður sellóleikari, var einn af stofnemðlimum Múm, hefur fengist við eigin tónsköpun í fjölmörg ár og gefið frá sér fjórar plötur í fullri lengd, starfað með fjölbreyttum hópi tónlistarmanna og samið tónlist fyrir leikhús, sjónvarp og kvikmyndir. 

Hún hlaut Tónlistarverðlaun Norðurlandaráðs árið 2019 fyrir tónlist sína en í umsögn dómnefndar sagði að sköpunarkraftur hennar brytist út með afgerandi rödd, frumlegum hljóðfæraleik og miklum persónutöfrum.