Mægðurnar Vanda Sig og Dísa sögðu fokk við of­beldi

Meðal gesta voru Vanda Sigurgeirsdóttir, Ingibjörg Sólrún Gísladóttir, Magnús Karl Magnússon prófessor, Embla Bachmann rithöfundur, Alma Ýr Ingólfsdóttir formaður ÖBÍ og Helga Lilja Magnúsdóttir, hönnuður FO-bolsins. Plötusnúðurinn Benni B-Ruff þeytti skífum og stemningin var mjög góð. 

Í fréttatilkynningu segir: 

„FO-bolurinn styður við starf UN Women í Afganistan en starfsemi stofnunarinnar hefur tekið stakkaskiptum frá því að talíbanar tóku völd í annað sinn þann 15. ágúst 2021. Þrátt fyrir það eru umfangsmestu verkefni UN Women einmitt í Afganistan. UN Women í Afganistan safnaði skilaboðunum frá afgönskum konum í tengslum við herferðina – skilaboðum sem konurnar vildu koma áfram til Íslendinga. 

Þær segjast búa yfir óbilandi styrk og von um bjartari framtíð en biðja alþjóðasamfélagið um að gleyma þeim ekki. Á FO-viðburðinum bauðst gestum til þess að skrifa skilaboð til baka til afganskra kvenna sem UN Women á Íslandi mun senda út til Afganistan.

Sala FO-bolsins hefur farið vel af stað. Þegar hafa um 200 bolir selst á aðeins tveimur dögum og því mikilvægt að hafa hraðar hendur, ætli fólk að tryggja sér eintak. 

Bolurinn var framleiddur í takmörkuðu upplagi, kostar 7.990 krónur og fæst á unwomen.is og í versluninni Kiosk á Granda. Verkefnið er styrkt af Öryggismiðstöðinni og rennur allur ágóði til verkefna UN Women í Afganistan.“

Hér má sjá myndir frá viðburðinum: