Kristall farinn að skora aftur eftir meiðslin

Kristall Máni hefur glímt við meiðsli síðustu mánuði og missti af endaspretti síðasta tímabils og fyrstu tveimur leikjum þessa tímabils. Hann sneri aftur í hópinn í þarsíðasta leik, spilaði svo tuttugu mínútur í síðasta leik og rúman hálftíma í dag.

Kristall kom inn á 58. mínútu, fljótlega eftir að Sönderjyske lenti 2-0 undir, og var ekki lengi að láta til sín taka.

Liðið hafði spilað manni færri frá því í fyrri hálfleik og virtist vera algjörlega heillum horfið en Kristall skoraði aðeins um fimm mínútum eftir að hann kom inn á, lagði boltann snyrtilega í netið eftir undirbúning og sendingu út í teiginn frá Andreas Oggesen.

Eftir að hafa minnkað muninn sótti Sönderjyske á bragðið og setti jöfnunarmark um stundarfjórðung síðar, á 79. mínútu. Maxime Soulas var þar á ferð, aftur eftir undirbúning Andreas Oggesen.

Sönderjyske hélt hins vegar ekki út með jafna stöðu og fékk á sig mark á lokamínútunum sem tryggði Fredericia 3-2 sigur.

Sönderjyske er í tíunda sæti dönsku úrvalsdeildarinnar eftir fimm umferðir og gæti dottið niður í fallsæti ef Silkeborg vinnur á morgun. Fredericia hefur komið mörgum á óvart í upphafi tímabils og fór upp í fjórða sæti með sigrinum.

Helgi Fróði spilaði hálfleik

Á sama tíma í Hollandi var Helgi Fróði Ingason í byrjunarliði Helmond Sport og spilaði fyrri hálfleikinn í 1-1 jafntefli á útivelli gegn Waalwijk í annarri umferðinni í næstefstu deild hollenska boltans.