Neymar fór grátandi af velli

Neymar þurfti að yfirgefa völlinn á 34. mínútu í 2-0 sigri Santos á Atletico Mineiro.

Neymar tognaði aftan í læri. Þetta var tímamótaleikur fyrir Neymar sem spilaði í treyju númer 100 í tilefni af því að þetta var hans hundraðasti leikur á Vila Belmiro, heimavelli Santos.

Neymar var nýkominn til baka eftir önnur meiðsli en hann hafði komið inn á sem varamaður í leiknum á undan.

Eftir að Santos komst í 2-0 þá lét Neymar vita af því að hann þyrfti skiptingu. Hann fór síðan niður í grasið og þurfti að lokum aðstoð við að yfirgefa völlinn.

Neymar fór grátandi af velli og bæði liðsfélagar og mótherjar reyndu að hugga hann.

Hann var síðan kominn með ís á lærið á varamannabekknum.

„Það er oft snemmt til að vita hversu slæmt þetta er. Við vitum meira á morgun,“ sagði César Sampaio, þjálfari Santos.

„Þetta er mikill missir fyrir okkur. Við verðum að biðjast fyrir um það að hann verði ekki lengi frá,“ sagði Sampaio

Neymar var valinn í landsliðið í síðasta glugga en missti af leikjum við Kólumbíu og Argentínu vegna meiðsla. Hann hefur ekki spilað með brasilíska landsliðinu siðan hann sleit krossband í landsleik í október 2023.

Hinn 33 ára gamli Neymar hefur leikið ellefu leiki með Santos í endurkomunni til æskufélagsins og er með þrjú mörk og þrjár stoðsendingar í þeim.