„Við verðum að vinna Ís­land“

Tvö frábær mörk úr hornspyrnum skiluðu Íslandi 2-0 sigri gegn Svartfjallalandi þegar liðin mættust á Laugardalsvelli í september. Orri Óskarsson og Jón Dagur Þorsteinsson skoruðu mörkin.

„Við fengum á okkur tvö mörk í kringum hálfleikshléið. En Ísland hefur bara skorað einu marki minna en topplið Tyrklands í keppninni svo þetta er gæðalið og ef við ætlum að vinna verðum við að spila mikið betur en í Reykjavík,“ segir Edvin Kuc, miðjumaður Svartfjallalands.

Sigurinn á Svartfellingum er eini sigur Íslands til þessa í keppninni en eftir tvö töp gegn Tyrkjum og jafntefli við Wales er Ísland með fjögur stig í 3. sæti síns riðils, í B-deild Þjóðadeildarinnar. Tyrkland er með tíu stig og Wales átta.

Svartfjallaland er hins vegar án stiga, nú þegar aðeins tvær umferðir eru eftir, svo að ef að Ísland nær jafntefli eða sigri á laugardaginn enda Svartfellingar neðstir og falla niður í C-deild.

Með jafntefli eða sigri Íslands á laugardaginn yrði einnig ljóst að Ísland myndi enda í 3. eða 2. sæti. og spila í umspili 20. og 23. mars. Liðið í 3. sæti fer í umspil við lið úr C-deild um að forðast fall, en liðið í 2. sæti í umspil við lið úr A-deild um að komast upp í A-deild.

„Við erum meðvitaðir um þá stöðu sem við erum í. Án stiga eftir fjóra leiki. Það bjóst enginn af okkur við þessu,“ segir Edvin Kuc.

„Staðan er alveg á hreinu. Ef við viljum halda okkur í B-deildinni þá verðum við að vinna Ísland. Öll einbeiting er á þann leik. Íslendingarnir eru með fjögur stig svo að með sigri værum við bara einu stigi á eftir þeim, og þeir fara til Wales í lokaumferðinni svo við gætum vonast til að ná þeim með því að vinna sjálfir Tyrkland,“ segir Kuc.