Þrír leik­menn Marseil­le með vafa­sama for­tíð

Frægastur þremenninganna er eflaust Mason Greenwood, fyrrverandi leikmaður Manchester United á Englandi. Frægðarsól hans reis hátt og framtíðin var björt. Viðvörunabjöllur hringdu þó þegar Greenwood kom til Íslands með enska landsliðinu og fékk íslenskar stúlkur upp á herbergi til sín ásamt Phil Foden þegar kórónuveiran var sem skæðust og samkomubönn voru í gildi.

Ekki löngu síðar birti þáverandi kærasta Greenwoods myndir af sér alblóðugri og sagði hann bera ábyrgð. Þá birti hún hljóðskilaboð þar sem heyra mátti Greenwood reyna að þvinga hana til samræðis.

Greenwood spilaði ekki fyrir Man United eftir þetta en var lánaður til Getafe á Spáni á síðustu leiktíð. Marseille keypti svo leikmanninn á tugi milljóna punda í sumar.

Greenwood er ekki eini leikmaður Marseille með vafasama fortíð en félagið keypti einnig hinn 21 árs gamla Elye Wahi í sumar. Í október árið 2021 lagði 22 ára gömul kona fram kæru á hendur Wahi fyrir að kýla sig á skemmtistað mánuði áður. Wahi, sem var þá 18 ára gamall leikmaður Montpellier, var aldrei dæmdur vegna málsins.

Í nóvember sama ár var leikmaðurinn undir rannsókn lögreglu vegna atvika sem sögðu voru hafa átt sér stað þegar hann var í unglingaliði Caen. Félagið lét hann á endanum fara án þess að gefa upp ástæðuna en Wahi var mikið efni og því skrítið að lið á borð við Caen hafi látið hann fara frítt.

Í nóvember 2021 kom hins vegar fram að lögreglan væri með til rannsóknar athæfi Wahi á salernum skólans sem hann var í þegar hann lék með unglingaliði Caen. Á leikmaðurinn að hafa þvingað yngri börn, talin á aldrinum 11 til 14 ára, til að fróa sér fyrir framan hann. Líkt og með kæruna sama ár var Wahi aldrei dæmdur.

Að lokum er það hinn 27 ára gamli Amine Harit sem keyrði á mann í heimalandi sínu Marokkó árið 2018 með þeim afleiðingum að hann dó. Harit var þarna stjarna Schalke 04 í Þýskalandi og nýbúinn að spila fyrir þjóð sína á HM.

Harit sagði 14 ára gamlan bróðir sinn hafa verið við stýrið en lögreglan afsannaði þá staðhæfingu. Þá segir að leikmaðurinn hafi reynt að flýja vettvang slyssins en hafi verið stöðvaður af vitnum. 

Marseille byrjar tímabilið sem fyrr af krafti eftir 5-1 sigur á Brest þar sem Greenwood skoraði tvívegis, Luis Henrique tvívegis og Wahi einu sinni. Þá lagði Harit upp tvö mörk. Roberto De Zerbi, fyrrverandi þjálfari Brighton & Hove Albion, er þjálfari Marseille í dag.