Gult ástand gildir á Suðausturlandi frá klukkan þrjú í nótt til tvö eftir hádegi og spáð fimmtán til tuttugu metrum á sekúndu vestan Öræfa og má búast við snörpum vindhviðum. Varasamar aðstæður verða fyrir ökutæki sem taka á sig mikinn vind á svæðum bæði á Suðurlandi og Suðausturlandi. Þessu er greint frá á vef Veðurstofu Íslands.
Einar Sveinbjörnsson, veðurfræðingur hjá Veðurvaktinni segir útlit fyrir austan hvassviðri og jafnvel storm með suðurströndinni frá því í nótt og fram yfir hádegi á morgun. Undir Eyjafjöllum og í Mýrdal megi reikna með snörpum hviðum sem geti náð þrjátíu til fjörutíu metrum á sekúndu og nái hámarki á milli klukkan sex og hádegis. Eins verði hviður í Öræfum við Sandfell og Hof um svipað leyti.
Hlýjast á Vesturlandi
Veðurstofan spáir rigningu á Suðaustur- og Austurlandi í dag, annars vætu með köflum, einkum síðdegis og þá talsverð rigning austast á landinu. Vindur gengur í austan og norðaustan átta til fimmtán metra á sekúndu. Hiti átta til sextán stig, hlýjast á Vesturlandi. Dregur úr vætu í kvöld.
Austan átta til fimmtán metrar á sekúndu og væta með köflum á morgun, en þrettán til tuttugu metrar á sekúndu syðst á landinu fram eftir degi. Yfirleitt þurrt á Vesturlandi og í innsveitum norðanlands. Hiti víða níu til átján stig, hlýjast vestantil.
Leiðindaveður á mánudag
Alldjúp lægð er að hringsóla fyrir sunnan land, að því er fram kemur í hugleiðingum veðurfræðings hjá Veðurstofunni. Henni fylgi austan og norðaustan kaldi eða stinningskaldi með rigningu suðaustan- og austanlands. Síðdegis og í kvöld rigni einnig um tíma í öðrum landshlutum.
Í kvöld dragi úr vætu en í nótt herði á vindi syðst á landinu. Fyrri part laugardags sé útlit fyrir austan hvassviðri á svæðinu frá Öræfum og vestur undir Eyjafjöll, þar á meðal í Vestmannaeyjum. Þá segir veðurfræðingur að varasamar aðstæður geti skapast fyrir ökutæki sem taka á sig mikinn vind auk þess sem veðrið geti haft talsverð áhrif á tjaldferðalanga. Eftir hádegi dragi smám saman úr vindi á þessum slóðum.
Í öðrum landshlutum verði vindur hægari og væta með köflum, en yfirleitt þurrt og milt vestanlands og í innsveitum á Norðurlandi.
Norðaustan og austan fimm til þrettán metrum á sekúndu með rigningu suðaustantil er spáð á sunnudag, en aðrir landshlutar sleppa þó ekki alveg við vætu. Á mánudagsmorgun er síðan spáð leiðindaveðri, hvassri norðaustanátt með rigningu um allt land. Þeim sem eiga eitthvað undir veðri er bent á að fylgjast vel með veðurspám.
Veðurhorfur á landinu næstu daga
Á laugardag: Austan 8-15 og væta með köflum, en 13-20 m/s syðst á landinu fram eftir degi. Yfirleitt þurrt á Vesturlandi og í innsveitum norðanlands. Hiti víða 9 til 18 stig, hlýjast vestantil.
Á sunnudag: Norðaustan og austan 5-13 og dálítil væta með köflum, þó síst vestanlands. Hiti 8 til 17 stig, hlýjast á Suðvesturlandi. Hvessir við suðausturströndina um kvöldið.
Á mánudag (frídagur verslunarmanna): Norðaustan 10-18, en hvassara suðaustantil fram eftir morgni. Víða rigning, talsverð úrkoma um tíma á Austfjörðum, en væta með köflum á Suður- og Suðvesturlandi. Hiti 8 til 16 stig, mildast sunnan heiða. Lægir sunnan- og austanlands seinnipartinn.
Á þriðjudag: Norðaustlæg átt og rigning, en úrkomulítið suðvestan- og vestanlands. Hiti breytist lítið.
Á miðvikudag: Norðlæg átt. Súld eða rigning og svalt í veðri norðantil, en þurrt og mildara syðra.
Á fimmtudag: Norðlæg átt og skýjað en úrkomulítið.
