Árni Marinó bestur á meðan at­vinnu­­maðurinn fyrir vestan skrapar botninn

Tölfræðiveitan WyScout heldur utan um Bestu deild karla og má finna ótrúlega tölfræðimola þar inni. Þar á meðal er tölfræði yfir hversu mörg mörk markverðir deildarinnar hafa komið í veg fyrir (e. prevented goals). 

Hvernig það er reiknað er spurning sem verður ekki svarað hér en um er ræða tölfræði sem tekur saman öll skot og reiknar út hversu mörg þeirra væru varin af „meðalmarkverði.“ Þannig geta markverðir deildarinnar verið í plús eða mínus, þeir sem eru í plús ættu því í raun að hafa fengið á sig fleiri mörk á meðan þeir sem eru í mínus ætti að hafa fengið á sig færri mörk.

Hinn 22 ára gamli Árni Marinó Einarsson, markvörður Skagamanna, hefur verið magnaður á leiktíðinni. Hann svo gott sem tryggði ÍA stig gegn Breiðabliki í gær, sunnudag. Var það langt í frá fyrsta stigið sem hann tryggir Skagamönnum á leiktíðinni en gulir eru sem stendur í Evrópubaráttu.

Í skýrslu Vísis frá Kópavogsvelli segir um atvik leiksins:

„Árni Marinó Einarsson, markmaður ÍA, bjargaði sínum mönnum fyrir horn þegar hann átti stórkostlega tvöfalda markvörslu. Fyrst varði hann frá Oliver Sigurjónssyni sem átti skot hægra megin í teignum en boltinn datt beint fyrir Benjamin Stokke sem átti bara eftir að renna boltanum í markið en Árni náði að verja með fætinum.“

Þá var hann ein af stjörnum leiksins. Bæði hjá Vísi og í Stúkunni.

„... markmaður ÍA, var frábær í kvöld. Gestirnir gátu þakkað honum að Breiðablik komst ekki á blað í fyrri hálfleik þrátt fyrir sex skot á markið.“

Þegar 11 umferðir eru búnar er Árni Marinó búinn að koma í veg fyrir 7,41 mark. Hann hefur 15 sinnum þurft að sækja boltann í netið það sem af er leiktíð en í raun ætti Skagamaðurinn ungi að hafa gert það 22 sinnum. Er hann eini markvörður deildarinnar sem hefur komið í veg fyrir meira en fjögur mörk. 

Ingvar Jónsson, markvörður Íslands- og bikarmeistara Víkings, hefur komið í veg fyrir 3,48 mörk í aðeins níu leikjum. Það er tveimur leikjum minna en Árni Marinó hefur spilað og þremur minna en Frederik Schram, markvörður Vals hefur leikið. 

Schram hefur komið í veg fyrir 1,84 mörk og þá er Guy Smit, markvörður KR, óvænt aðeins einn fjögurra markvarða sem hefur komið í veg fyrir meira en eitt mark á leiktíðinni. 

Alls hafa 16 markverðir spilað í Bestu deild karla á leiktíðinni og tveir þeirra eru með yfir fimm mörk í mínus til þessa. Árni Snær Ólafsson hefur engan veginn náð að halda dampi frá því á síðustu leiktíð þegar hann var einn af betri markvörðum deildarinnar. 

Þó það sé erfitt að kenna Árna Snæ um fjórða mark HK í Kórnum þá lítur það aldrei vel út þegar markvörður fær á sig mark nánast frá miðju, hvað þá þegar um sigurmark undir lok leiks er að ræða. 

Árni Snær er sem stendur 5,11 mörk í mínus og aðeins einn markvörður toppar það, á slæman hátt. Það er William Eskelinen, markvörður Vestra. Fyrir mót var búist við miklu af hinum 27 ára gamla Eskelinen sem hefur meðal annars spilað í efstu deild Danmerkur og Svíþjóðar:

„... með AGF og sænsku úrvalsdeildinni með Sundsvall. Síðustu tvö tímabil hefur hann varið mark Örebro í sænsku 1. deildinni. Það er þó þekkt stærð að erlendir markverðir eiga oft erfitt uppdráttar til að byrja með enda vindáttin og blindandi sól ekki eitthvað sem menn alast upp við nema á Íslandi,“

sagði í grein á Vísi þegar farið var yfir markverði Bestu deildarinnar fyrir mót. Eskelinen er 5,29 mörk í mínus og fékk það óþvegið frá þjálfara sínum eftir 1-5 tap gegn Val á Ísafirði um liðna helgi.

Hér að neðan má sjá tölfræði markvarða deildarinnar í heild sinni.