Svöl suð­vestan­átt í dag en stormur á morgun

Á vef Veðurstofunnar segir að yfirleitt verði úrkomulítið um landið norðaustanvert og að frost á landinu verði á bilinu núll til sex stig.

„Vestan kaldi eða strekkingur á morgun og áfram él, en um og eftir hádegi er útlit fyrir að það hvessi á sunnanverðu landinu, hvassviðri eða stormur þar seinnipartinn og varasamt ferðaveður. Þessi vestanstrengur hefur verið nokkuð á reiki í spám síðustu daga og er fólk hvatt til að fylgjast með veðurspám. Annað kvöld dregur svo úr vindi og ofankomu.

Þess má geta að á morgun á ört dýpkandi lægð að fara til norðausturs fyrir suðaustan land. Spár gera ráð fyrir að hún muni ekki hafa mikil áhrif hér á landi, en hún á að valda miklu illviðri í Færeyjum og Vestur-Noregi,“ segir á vef Veðurstofunnar.

Veðurhorfur á landinu næstu daga

Á miðvikudag: Vestan 8-15 m/s, en 15-20 sunnantil seinnipartinn. Víða él og frost 0 til 8 stig. Dregur úr vindi um kvöldið.

Á fimmtudag: Suðvestan 8-15 og skúrir eða él, en hægari seinnipartinn og allvíða rigning eða slydda. Lengst af þurrt um landið norðaustanvert. Hlýnandi, hiti 1 til 8 stig undir kvöld.

Á föstudag: Gengur í suðvestan 13-20 og kólnar með éljum, en úrkomulítið á Norðaustur- og Austurlandi. Frost 0 til 7 stig síðdegis.

Á laugardag: Suðvestlæg eða breytileg átt og él, en lengst af þurrt á Austurlandi. Frost 1 til 12 stig.

Á sunnudag og mánudag: Norðlæg eða breytileg átt og él, en þurrt að kalla um landið suðvestanvert. Kalt í veðri.