Lægð yfir landinu og ekkert hlé á vætutíðinni

Magnús Jochum Pálsson skrifar 18. maí 2023 08:14

Samkvæmt Veðurstofunni verður ekkert hlé á vætutíðinni næstu daga og eru tvær lægðir á leið yfir landið. Vísir/Vilhelm

Lægð suðvestur af Reykjanesi hreyfist norðaustur yfir landið í dag og fylgja henni úrkomusvæði, sem rignir úr, einkum sunnan- og vestanlands.

Veðurstofan gerir ráð fyrir að suðaustantil og síðar sunnantil verði átta til þrettán metrar á sekúndu og það verði víða rigning í dag. Það verði úrkomulítið norðaustantil og hlýjast norðaustanlands. Hiti verði á bilinu átta til átján stig.

Seinni partinn verður vestlægari átt og þokusúld en seint í kvöld hvessir suðaustanlands með skúrum.

Fyrir norðan og á Austurlandi verður veðrið nokkuð hlýtt og gott en það er ekki hægt að segja um suðvesturhornið og Suðurland.Skjáskot

Lægðir á leið yfir landið

Í hugleiðingum veðurfræðings á vef Veðurstofunnar segir að skammt suðvestur af Reykjanesi sé lægð. Hún muni hreyfast norðaustur yfir landið í dag. Henni fylgi úrkomusvæði, sem rignir úr, einkum sunnan- og vestanlands.

Þá segir einnig að við Nýfundnaland sé ört vaxandi lægð, sem hreyfist allhratt norðnorðaustur á bóginn og verði með dýpsta móti þegar hún hreyfist norðaustur Grænlandssund. Í fyrramálið vaxi vindur úr suðri þegar lægðin nálgast og þá fer aftur að rigna. Það muni snúast í allhvassa eða hvassa suðvestanátt og síðan bæti í regnið síðdegis. Norðaustantil helst þurrt lengst af og það verði nokkuð hlýtt í veðri í dag og á morgun, einkum á Norðausturlandi.

Reikna megi með snörpum vindhviðum norðvestantil síðdegis á morgun og ökumenn eru því hvattir til að fara varlega á þeim slóðum.

Um helgina verði áfram suðvestanátt og ekkert hlé á vætutíðinni. Síðan muni í þokkabót kólnar heldur í veðri.

Veðurhorfur á landinu næstu daga

Á föstudag: Gengur í sunnan og síðar suðvestan 13-20 m/s, hvassast noðvestanlands. Súld eða rigning með köflum, en yfirleitt bjartviðri á norðaustanverðu landinu. Hiti 8 til 17 stig, hlýjast á Austurlandi.

Á laugardag: Suðvestan 13-18 m/s og skúrir eða dálítil rigning, en hægara og bjartviðri um landið norðaustanvert. Hiti 5 til 13 stig, mildast norðaustantil.

Á sunnudag: Stíf suðlæg átt og talsverð rigning, en úkomulítið norðantil. Hiti 6 til 14 stig, hlýjast á Norðausturlandi.

Á mánudag: Suðvestlæg eða breytileg átt, dálítil rigning með köflum og hiti 5 til 11 stig.

Á þriðjudag: Útlit fyrist stífa suðvestanátt og rigningu, en lengst af þurrt norðaustanlands. Milt veður.

Á miðvikudag: Útlit fyri vestanáttir með skúrum eða jafnvelslydduéljum, en þurrviðri austantil. Kólnandi veður.

Veður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir