Erlent

Að minnsta kosti fimm börn getin með stolnu sæði

Hólmfríður Gísladóttir skrifar
Að minnsta kosti fimm af þeim 50 börnum sem læknirinn átti þátt í að koma í heiminn voru getin með stolnu sæði.
Að minnsta kosti fimm af þeim 50 börnum sem læknirinn átti þátt í að koma í heiminn voru getin með stolnu sæði. Getty

Læknir á sjúkrahúsinu í Halmstad í Svíþjóð tók sæði frá mönnum sem höfðu skilað inn sýnum vegna frjósemisrannsókna og notaði til að gera konur þeim ókunnugar þungaðar. Frá þessu var greint í Uppdrag granskning fyrir helgi.

Að því er fram kemur í þættinum „Sæðisstuldurinn“ urðu að minnsta kosti fimm menn þannig feður án þess að veita samþykki fyrir notkun sæðisins. Einn þeirra, Bengt, segir málið sláandi.

„Hvað er að gerast með líf mitt? Ég er faðir barns sem fæddist átta mánuðum á undan dóttur minni,“ segir hann um uppljóstrunina. 

Bengt og eiginkona hans voru meðal þeirra sem leituðu til læknisins á árunum 1985 til 1996 vegna ófrjósemis. Uppdrag granskning greindi fyrst frá málinu í haust og sagði þá sögu Emelie Persson, sem fann líffræðilegan föður sinn með aðstoð erfðaefnis-ættfræðings.

Faðirinn, Zdravko Paic, hafði ekki frekar en Bengt nokkurn tímann veitt leyfi fyrir því að sæði hans yrði notað til að geta barn ókunnugrar konu.

Í nýja þættinum er fjallað um Rebecku Kristoffersson, líffræðilega dóttur Bengt, og systkini hennar, Alexöndru Pihl og Tobias Andersson. Öll voru getin með sæði sem var stolið af mönnum sem höfðu gefið sýni vegna sæðisrannsókna.

Læknirinn er látinn en er talinn hafa aðstoðað við um 50 þunganir. Í öllum þeim tilvikum sem blaðamennirnir rannsökuðu fengu börnin sem komu undir engar eða rangar upplýsingar frá sjúkrahúsinu.

Bengt spyr nú að því hver sé ábyrgur. „Þú getur ekki gert fólki þetta.“

Umfjöllun SVT.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×