Salah brenndi af vítaspyrnu þegar Liverpool tapaði fyrir nýliðunum

Liverpool tókst alls ekki að fylgja eftir stórsigrinum á erkifjendunum í Man Utd þegar liðið heimsótti nýliða Bournemouth í fyrsta leik helgarinnar í ensku úrvalsdeildinni.

Lærisveinar Jurgen Klopp hafa ekki verið sannfærandi í sinni spilamennsku á leiktíðinni til þessa en stuðningsmenn liðsins vonuðust eftir því að frábær 7-0 sigur á Man Utd um síðustu helgi gæfi góð fyrirheit fyrir síðustu vikur tímabilsins.

Liverpool byrjaði leikinn af krafti í dag en heimamenn náðu þó góðum upphlaupum í fyrri hálfleik og úr einu slíku náði Phillip Billing að koma Bournemouth í forystu eftir um hálftíma leik.

Klopp gerði sóknarsinnaða breytingu í leikhléi þar sem Diogo Jota kom inn fyrir Harvey Elliott.

Á 70.mínútu var vítaspyrna dæmd eftir að varnarmaður Bournemouth handlék knöttinn innan vítateigs.

Egyptinn Mohamed Salah fór á vítapunktinn en spyrna hans var hreint út sagt skelfileg og sigldi framhjá markinu.

Ekki tókst Liverpool að nýta lokamínútur leiksins til að jafna metin og lauk honum með 1-0 sigri Bournemouth.