Lands­menn andi ró­lega þrátt fyrir opin­berun meintra ó­­­siða

Myndskeið þar sem bandaríski áhrifavaldurinn Kyana Sue Powers fer yfir það sem henni þykir athugavert í fari Íslendinga hefur vakið athygli á TikTok. Powers hefur búið á Íslandi um nokkurt skeið og furðar sig meðal annars á harðfisksáti og ropum á almannafæri, lélegum snjómokstri og óhóflegri Pepsi Max-drykkju. 

„Þið eruð alltaf að sjúga hor upp í nefið á ykkur. Það er ógeðslegt og raunar frekar ókurteist, hið minnsta þar sem ég er alin upp. Við myndum aldrei gera þetta og þið gerið þetta á almannafæri. Þetta er óskiljanlegt fyrir mér. Þið ættuð kannski frekar að ganga um með vasaklút,“ segir hún í myndskeiðinu sem hefur fengið tæplega 50 þúsund áhorf á TikTok. 

„Það er alltaf hressandi þegar einhver bendir okkur á hvernig við erum og við munum ekkert taka þetta of bókstaflega,“ segir Albert sem var fenginn til að leggja mat á þessar aðfinnslur í Reykjavík síðdegis. Hann tekur undir að glöggt sé gests augað og bendir á að fleiri útlendingar hafi vakið máls á þessum nefsogskæk Íslendinga. 

„Það er nú ekki það versta af öllu. Fyrir okkur er það verra að snýta sér með látum í servíettu en við sjúgum öll upp í nefið. Það er svolítið áhugavert það sem hún tiltekur, þessi sex atriði eins og að borða harðfisk á almannafæri. Það hefur ekki hvarflað að mér að það væri eitthvað sem henni eða öðrum finnist athugavert en auðvitað er lyktin af harðfiski mjög sterk,“ segir Albert. 

„Svo er það þetta með að ropa án þess að afsaka sig. Ég held að þetta sé það sem margir útlendingar hafa nefnt. Við gerum þetta svolítið í hugsunarleysi og kannski tökum ekki eftir þessu sjálf. Ég myndi segja að af þessu sem hún tiltekur þá getum við helst bætt okkur í þessu og gert það kannski líka hljóðlega.“ 

Aðspurður um hvar Íslendingar þurfi helst að bæta sig þegar kemur almennt að borðsiðum segir Albert að landsmenn séu ekkert endilega að standa sig illa. 

„Við getum alltaf bætt okkur smátt og smátt hér og þar eins og að halda fallega á hnífapörum og vanda okkur aðeins með servíettuna en svona í stórum dráttum er þetta bara fínt. Kannski helsta vandamálið, og það á ekki bara við um Ísland heldur allan heiminn, það er notkun á símum við matarborðið.“

Albert kallar eftir því að fólk taki hið minnsta hljóðið af þegar það fer út að borða og reyni að skoða símann sem allra minnst. 

„En svo kannski ef maður er matarbloggari þá þarf maður aðeins að taka myndir,“ segir Albert léttur en sjálfur hefur hann lengi haldið úti síðunni Albert eldar. 

Taldi fyrst að fólk væri í vondu skapi

Það kom honum sérstaklega á óvart að Powers hafi minnst á að hún væri óvön því að heyra fólk tala á innsoginu. 

„Það er svolítið eins og með að sjúga upp í nefið að við tökum ekki eftir þessu.“ Ekki sé heldur um séríslenska hegðun að ræða. 

„Við eigum alls ekki að hætta að tala á innsoginu. Þetta er svolítið skemmtilegt og ef þetta er þjóðareinkenni þá er það bara fínt,“ bætir Albert við. 

Að sögn Powers taldi hún í fyrstu að talsmátinn gæfi til kynna að fólk væri óánægt eða merki um kaldhæðni. Síðar hafi hún þó tekið þessa hegðun upp ósjálfrátt og tali nú jafnvel á innsoginu við samlanda sína í Bandaríkjunum. 

„Þessi stúlka er með fínustu landkynningu og við skulum vera ánægð með hana þó hún sé aðeins nett að pota í okkur,“ segir Albert en Powers hefur lengi sérhæft sig í því að framleiða og birta myndbönd sem eiga það sameiginlegt að hafa íslenska náttúru og menningu í forgrunni.