Bróðir Balotelli ákærður fyrir líkamsárás

Barwuah er 29 ára gamall og leikur með Ospitaletto í ítölsku fjórðu deildinni, en hann hefur áður verið dæmdur fyrir líkamsárás, fyrir um tíu árum síðan.

Hann er sagður hafa barið á 26 ára gömlum Túnisa fyrir utan næturklúbb í Brescia ásamt rapparanum Prince the Goat þann 22. desember síðastliðinn.

Fórnarlambið er sagt hafa sýnt fram á þónokkur beinbrot í andliti þegar hann tilkynnti um árásina til lögreglu.

Bróðir Barwuah, Mario Balotelli, lék með Inter og AC Milan, Manchester City og Liverpool snemma á ferlinum sem fjaraði út. Hann er í dag 32 ára gamall og leikur með Sion í Sviss en hann var liðsfélagi Birkis Bjarnasonar hjá Adana Demirspor í Tyrklandi síðasta vetur.