Tónlist

Óttist að einungis áhrifavaldar á nærbuxunum komist áfram í Eurovision

Dóra Júlía Agnarsdóttir skrifar
Blaðamaður ræddi meðal annars við Kristínu Kristjáns hjá FÁSES og söngvarann Friðrik Ómar um viðbrögð þeirra við breytingum á stigakerfi Eurovision.
Blaðamaður ræddi meðal annars við Kristínu Kristjáns hjá FÁSES og söngvarann Friðrik Ómar um viðbrögð þeirra við breytingum á stigakerfi Eurovision.

Friðrik Ómar Hjörleifsson, tónlistarmaður og Eurovision spekingur, segir að breytingar á stigakerfi Eurovision valdi usla hjá fólki. Hann telur þetta þó vera skref í rétta átt.

Friðrik Ómar er reynslubolti í Eurovision heiminum en hann fór meðal annars út fyrir Íslands hönd árið 2008 ásamt Regínu Ósk. Saman mynduðu þau Eurobandið og höfnuðu 14. sæti í lokakeppninni með lagið This is my life.

Lífið á Vísi greindi frá þessum nýtilkomnu stigabreytingum í gær en þær fela meðal annars í sér að áhorfendur munu einir ráða því hverjir komast áfram í undanúrslitunum og munu dómarar ekki hafa neitt um málið að segja fyrr en á lokakvöldinu. 

Fólk heima í stofu ekki svo einfalt

Á undanúrslitakvöldinu munu dómnefndir landanna þó greiða atkvæði en niðurstöður þeirra verða ekki notaðar nema ef til þess kemur að eitthvað fari úrskeiðis í símaatkvæðagreiðslunni.

„Menn óttast mest að þetta komi niður á gæðum laga. Að þetta verði bara áhrifavaldar á nærbuxunum sem komast áfram,“ segir Friðrik í samtali við Vísi og bætir við: „Ég held hins vegar að fólk heima í stofu sé ekki svona einfalt. Það veit alveg hvenær lag er gott og hvenær ekki.“

Þá segir hann að það séu aðallega lagahöfundarnir sem eru ósammála þessu.

„Og ekki síst þeir sem taka aldrei þátt í keppninni. 

Keppnin er að þróast og ég held að þetta sé skref í rétta átt.“

Vill ekki jarða þetta

Kristín H. Kristjánsdóttir hjá FÁSES, félagi áhugafólks um Söngvakeppni evrópskra sjónvarpsstöðva, segir í samtali við blaðamann að það verði spennandi að sjá hvað breytingarnar leiða af sér. Hún segir viðbrögð hjá fólki vera mikil.

„Ég veit ekki hvernig þetta fer. Það gæti farið svo að þessi litlu lönd eins og Ísland, Malta og Austurríki sitji svolítið eftir en að sama skapi gætu lög flogið áfram því skrýtnari sem þau eru. Þetta gæti farið allavega en ég segi að við prófum eitt ár og sjáum hvað gerist. 

Ég ætla ekkert að jarða þetta, ég vil sjá hvernig þetta útfærist.“
Kristín Kristjánsdóttir, bloggari hjá Wiwibloggs og meðlimur FÁSES.

Svíar hafa þurft að treysta á dómaraatkvæðin

Twitter logar um þessar mundir af athugasemdum Eurovision aðdáenda sem eru margir hverjir ekki sáttir með ákvörðunina.

„Ég sé á Twitter að Sietse Bakker hefur ekki á undan að svara gagnrýni, hann er örugglega kominn í fullt starf,“ segir Kristín og hlær. Hún segir þessa breytingu vera eitthvað sem Svíar hafa viljað gera í mörg ár.

„Nú er auðvitað Svíinn Martin Österdahl yfir keppninni og þá fara þeir í þetta af fullum krafti.“

Hún bætir við að það verði einfaldlega að sjá hvernig þetta gengur.

„Svíar hafa ekki verið að skora mjög hátt í símakosningum til dæmis og dómnefndirnar hafa haldið Svíum inn í keppni undanfarin ár. Ef þeir sitja eftir næsta vor vegna þessara breytinga þá verður þessi kannski breytt aftur, hver veit. 

Það eru margir með þá kenningu, að Svíar eigi eftir að verða hvað sárastir yfir breytingum sem þeir unnu mikið við að koma i gegn.

Þetta verður forvitnilegt en ég vil sjá hvernig og hvort þetta gengur,“ segir Kristín að lokum.

Hefur áhyggjur af því að góð lög sitji eftir

Inga Auðbjörg Straumland er mikil áhugakona um Eurovision og býr yfir blendnum tilfinningum hvað varðar nýju stigareglurnar. 

„Ég er spennt fyrir því að heimurinn fái að kjósa, þó það hafi lítið vægi, en ég syrgi dómnefndir. Ég er soddan snobb að ég er yfirleitt meira sammála dómnefndum en lýðræðinu. Dómnefndin er ekki eins ginkeypt fyrir gimmikkum, þannig að ég hef áhyggjur af því að góð lög sitji eftir. 

Ég er lýðræðissinni úr hófi fram, nema þegar það kemur að Júróvisjón.“ 

Hún bætir við að það verði spennandi að fylgjast með framvindu mála í Liverpool næsta vor.

„Það verður áhugavert að sjá mynstrin og hvaðan atkvæðin koma. Hvort latín Ameríka kjósi bara Spán og Portúgal og hvernig þetta dreifist.“ 


Tengdar fréttir

Meiri­háttar breyting á stiga­kerfi Euro­vision

Stórar breytingar hafa verið gerðar á stigakerfi Eurovision fyrir keppnina sem fer fram þann 13. maí í Liverpool. Aðeins áhorfendur munu ráða því hverjir komast áfram í undanúrslitunum og munu dómarar ekki hafa neitt um málið að segja fyrr en á lokakvöldinu. 

Eurovision fer fram í Liverpool á næsta ári

Breska borgin Liverpool mun hýsa 67. Eurovision-söngvakeppnina fyrir hönd Úkraínu á næsta ári. Samband evrópskra sjónvarpsstöðva (EBU) greindi frá þessu í dag en áður hafði komið fram að valið stæði milli Glasgow og Bítlaborgarinnar.






Fleiri fréttir

Sjá meira


×