Kristian hleypt lausum og Ísland gæti opnað leið að Ólympíuleikum

Um er að ræða seinni leikinn í umspili um sæti á EM. Útivallamörk skipta ekki máli og því er það þannig að takist Íslandi að vinna eins marks sigur í dag þarf að grípa til framlengingar og jafnvel vítaspyrnukeppni til að skera úr um það hvort liðanna kemst á EM í Georgíu og Rúmeníu næsta sumar.

Það ætti að styrkja íslenska liðið mikið að Kristian Nökkvi Hlynsson, miðjumaður Ajax, er laus úr leikbanninu sem hann var í í fyrri leiknum. Hins vegar er Ísland án markaskorarans úr þeim leik, Sævars Atla Magnússonar, sem er í banni í dag og þá dró Ísak Snær Þorvaldsson sig úr hópnum vegna tannsýkingar.

Ef Ísland kemst á EM í dag yrði það í þriðja sinn í sögunni. Ísland lék í fyrsta sinn í lokakeppni EM U21-landsliða árið 2011, með gullkynslóðina sem síðar kom A-landsliðinu á EM og HM innanborðs. Ísland var svo aftur með í lokakeppninni í fyrra en vegna kórónuveirufaraldursins var hún tvískipt og komst Ísland ekki á seinna stigið.

Liðin sextán sem leika í lokakeppni EM næsta sumar berjast ekki bara um verðlaun á mótinu heldur einnig sæti í fótbolta karla á Ólympíuleikunum í París 2024. Í fótbolta karla á Ólympíuleikum spila nefnilega U23-landslið þjóða, en leyft er að hafa þrjá eldri leikmenn innanborðs.

Aðeins þrjú laus sæti á Ólympíuleikunum eru þó í boði á EM. Frakkar, sem gestgjafar, fá svo eitt sæti og því dugar að komast í undanúrslit á EM ef Frakkar komast þangað.