„Skiptir miklu máli að kippa henni út úr leiknum“

Miedema er 26 ára en er samt markahæst í sögu ensku úrvalsdeildarinnar, búin að skora yfir 100 mörk fyrir Arsenal og nálgast hundraðasta markið fyrir Holland.

Ef Glódísi tekst að halda Miedema í skefjum aukast líkurnar verulega á að Ísland forðist tap á morgun og fái þar með farseðil á HM í fyrsta sinn.

„Það skiptir miklu máli fyrir okkur að ná að kippa henni út úr leiknum. Hún er auðvitað heimsklassaleikmaður og skorar mikið af mörkum fyrir þær. En þær eru líka með frábæra miðjumenn og kantmenn svo það er mikið af hlutum sem við þurfum að passa upp á í leiknum, sérstaklega varnarlega,“ segir Glódís en hún ræddi við Vísi í blíðviðrinu í Utrecht í gær og má sjá viðtalið hér að neðan.

Íslandi dugar jafntefli á morgun en það er erfitt að fara inn í leik með það í huga að ætla að láta það duga:

„Við förum aldrei inn í leik til að gera jafntefli, klárlega til að vinna hann, en svo verður maður líka að spila með hausnum. Það fer eftir því hvernig þetta spilast og hvernig dagur þetta verður. Við vitum að okkur dugar stig og þær þurfa sigur, svo þær munu koma inn í leikinn og taka sénsa, og spila aðeins sóknarsinnaðri leik en við þurfum að gera.“

Ísland tapaði fyrir Hollandi fyrir tæpu ári síðan, 2-0 á Laugardalsvelli, en var þá reyndar án fyrirliðans Söru Bjarkar Gunnarsdóttur sem þá var ólétt.

Finnst við hafa verið að nálgast þessi lið

„Mér fannst við ekkert spila neitt rosalega illa gegn þeim síðast. Þetta var ekki leikur þar sem þær voru að vaða eitthvað í færum, og mér fannst við líka vera að skapa okkur færi. Þær vinna þennan leik jú 2-0, sannfærandi sigur, en mér finnst við með árunum hafa verið að nálgast þessi lið. Þær eru samt sem áður með heimsklassalið og mjög ofarlega á öllu listum. Þetta er hörkulið sem við erum að fara að mæta en mér finnst við líka vera á góðum stað svo þetta verður spennandi leikur.

Allir leikmennirnir þeirra spila í stórum deildum og í Meistaradeildinni. Þær eru með mjög flottan hóp af leikmönnum en við líka. Þær hafa verið að vinna medalíur á síðustu stórmótum og ætla sér líka beint á HM, þannig að þetta verður alvöru úrslitaleikur því bæði lið fara inn í hann með miklar væntingar og vonir,“ segir Glódís.

Ísland og Holland mætast á morgun í Utrecht í úrslitaleik um öruggt sæti á HM. Leikurinn hefst klukkan 18:45 að íslenskum tíma. Tapliðið fer í umspil. Vísir er á staðnum og flytur fréttir heim af stelpunum okkar.