Tónlist

Í lari lei æðið útskýrt: „Þetta barnalag er búið að vera að gera allt brjálað“

Sylvía Rut Sigfúsdóttir skrifar
Sigga Beinteins og Grétar Örvarsson á Tónleikaveislu Bylgjunnar á Menningarnótt.
Sigga Beinteins og Grétar Örvarsson á Tónleikaveislu Bylgjunnar á Menningarnótt. Vísir/Hulda Margrét

Lagið Í larí lei gerði allt vitlaust á tónleikum Stjórnarinnar í Hljómskálagarði á Menningarnótt. Það kemur lítið á óvart enda er það spilað á böllum um allt land við góðar undirtektir þessa dagana. 

Viðbrögðin á Tónleikaveislu Bylgjunnar á Menningarnótt voru virkilega góð þegar Stjórnin tók lagið Í lari lei. Myndband af þessu má sjá í spilaranum hér fyrir neðan.

„Viðbrögðin voru alveg ótrúleg, það voru gjörsamlega allir hoppandi og dansandi með.“

Klippa: Stjórnin - Í lari lei

Uppgötvað á barnadiskóteki á Spáni

Sigga Beinteins flytur lagið reglulega með stjórninni en það kom samt upprunalega út með brasilísku stórstjörnunni Xuxa undir nafninu Ilariê. Sigga gaf lagið svo út með texta Ómars Ragnarssonar árið 1998. Lagið var að finna á þriðju breiðskífu söngkonunnar, barnaplötunni Flikk-flakk.

„Þetta byrjaði allt á því að ég var á hóteli úti á Spáni þar sem barnadagskrá var í gangi. Þá heyrði ég lagið fyrst. Ég varð strax heilluð af þessu lagi,“ segir Sigga í samtali við Lífið. 

„Ég fór í plötubúð og keypti disk með laginu. Ég set þetta svo á þennan barnadisk sem ég gaf út 1998. Síðan setjum við þetta inn á Söngvaborg mikið seinna þegar við tókum nokkur lög af Flikk-Flakk þar inn.“

Neitaði fyrst að spila lagið

Spólum svo áfram til ársins 2018, þegar Kristján Grétarsson, gítarleikari Stjórnarinnar, stakk upp á því við hljómsveitina að þau tækju þetta lag á tónleikum.

„Ég sagði fyrst nei, þetta er bara af barnadisk. En hann sagði mér þá að þetta væri spilað út um allt í partýum svo við ákváðum að prófa að spila þetta í Búðardal á balli,“ útskýrir Sigga.

„Þetta var að virka og upp úr því ákváðum við að byrja að spila þetta meira.“

Stjórnin tók meðal annars lagið á Þjóðhátíð 2019 og Sigga segir að það hafi allt orðið „kreisí“ í Dalnum.

„Við höfum spilað það síðan. Það er alveg ótrúlegt að þetta litla barnalag verði svona stórt og mikið og það hefur aldrei verið spilað í útvarpi,“ segir Sigga og hlær. „Þetta barnalag er búið að vera að gera allt brjálað.“

Þrefalt á topplistum Spotify

Það eru fleiri en Stjórnin sem að spila lagið Í lari lei á tónleikum.

„Það hafa allir leyfi til að spila hvað sem er. Mér finnst það bara frábært, gaman að heyra lag sem ég gaf út,“ segir Sigga. „Fótboltafélög hafa til dæmis mikið verið að syngja þetta sem er skemmtilegt.“

Það komst í fjölmiðla á dögunum þegar Stuðlabandið vakti skyndilega athygli í Brasilíu eftir að þeirra flutningur komst í dreifingu þar í landi.

„Þeir eru í raun að spila Stjórnarútgáfuna, byrjuðu að taka lagið eftir að Stjórnin spiluðum með þeim á Kótelettunni í fyrra. Rapparar eru líka byrjaðir að taka þetta lag og Ingi Bauer er búinn að gera sína útgáfu.

„Lagið er á þremur stöðum á topplistanum núna. Mín upprunalega útgáfa, Stuðlabandið og Ingi Bauer. Það er virkilega skemmtilegt.“

Hún útilokar ekki að Stjórnin setji sína útgáfu líka á Spotify. Stjórnin er að spila á fullu þessa dagana og Sigga segir að veturinn sé orðinn þétt bókaður.

„Þetta er búið að vera frábært eftir þetta hlé.“


Tengdar fréttir

Stuðlabandið springur út í Brasilíu

Hljómsveitin Stuðlabandið vakti athygli á Kótelettunni nú í júlí þegar þeir tóku hið sígilda barnalag Í larí lei og allt ætlaði um koll að keyra en atriðið var tekið upp á myndband sem birtist á vefsíðunni Youtube. Lagið er upphaflega gefið út af brasilísku tónlistarkonunni XUXA og heitir Ylarie en í kjölfar óvæntrar atburðarrásar birti hún myndbandið af Stuðlabandinu á Instagram síðu sinni. Blaðamaður heyrði í Fannari Frey meðlim Stuðlabandsins.






Fleiri fréttir

Sjá meira


×