Önnur lægð á leið yfir landið en enn hlýtt norðaustantil

Hallgerður Kolbrún E. Jónsdóttir skrifar 31. ágúst 2022 06:57

Talsverð úrkoma verður á Suður- og Vesturlandi í dag. Vísir/Vilhelm

Önnur lægð mun ganga yfir landið núna í morgunsárið en henni fylgir rok og rigning sunnan- og vestanlands. Hlýjast verður norðaustantil þar sem hitastig mun líklega ná átján gráðum.

Þetta kemur fram í hugleiðingum veðurfræðings á vef Veðurstofunnar. Þar segir að lægðinni fylgi sunnan 8 til 15 m/s og rigning á Suður- og Vesturlandi. Útlit sé fyrir talsverða úrkomu víða, einkum við fjöll.

Norðaustantil megi jafnframt búast við rigningu en þó í mun minna magni. Áfram verði hlýjast á norðaustanverðu landinu þó ekki megi búast við jafn heitum degi og í gær.

Á morgun stefnir í hæglætisveður með skúrum víða um land og enn kólnar norðaustantil með hámarkshita þar um þrettán gráður. Svipaður hiti verður í flestum öðrum landshlutum.

Veðurhorfur næstu daga

Á fimmtudag: Norðlæg eða breytileg átt 3-10 m/s og skúrir. Hiti 7 til 13 stig.

Á föstudag: Norðan og norðaustan 8-15 m/s. Rigning með köflum um landið austanvert fyrri hluta dags, annars þurrt að kalla og jafnvel bjart suðvestantil. Hiti 6 til 14 stig, mildast sunnan heiða.

Á laugardag: Fremur hæg breytileg átt og bjart með köflum, en suðvestan strekkingur á Vestfjörðum um kvöldið. Hiti 8 til 15 stig.

Á sunnudag: Vestlæg eða breytileg átt og víða bjartviðri, en skýjað með köflum vestantil og lítilsháttar væta þar þegar líður á daginn. Hiti breytist lítið.

Veður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.