Menning

„Sumt er á yfirborðinu, annað lendir undir“

Dóra Júlía Agnarsdóttir skrifar
Sandra H. Andersen stendur fyrir sýningu á morgun, Menningarnótt.
Sandra H. Andersen stendur fyrir sýningu á morgun, Menningarnótt. Aðsend

Listakonan Sandra H. Andersen sækir innblástur í áhugaverðar konur í listsköpun sinni en hún hefur verið búsett í Bandaríkjunum síðastliðin átta ár, fyrst í Los Angeles og svo í New York þar sem hún býr í dag. Sandra stendur fyrir sýningunni Lag eftir lag sem er einungis opin á morgun, Menningarnótt, en blaðamaður heyrði í henni og fékk að skyggnast inn í hennar listræna hugarheim.

Sköpunarútrás

„Ég byrjaði að vinna þessi tilteknu verk í upphafi síðasta árs. Þá fékk ég tækifæri til að vinna úti og hóf því rekstur Studio Andersen,“ segir Sandra og bætir við:

„Verkin eru gerð úr pappír og raða ég honum saman og bý til skugga, línur og áferð. Ég hef aðallega verið í námi og hef verið að læra ritlist en ég hef alltaf fengið mikla útrás í sköpun.“

Verk Söndru einkennast af lögum.Aðsend

Ferlið við sýninguna hefur gengið vel að hennar sögn.

„Þegar það kom að þessum verkum þá gat ég í rauninni setið tímunum saman að reyna að rífa hina fullkomnu beinu línu. 

Ég var alltaf með blöðrur á fingrunum, þegar allt rif, skuggar, öll lög, fór að þýða miklu meira. Þetta myndaði eina fullkomlega ófullkomna heild. Ég byrjaði að sjá fegurðina í þessu ófullkomna. Allt þetta hefur tilgang í myndunum.“

Í dagskrá Menningarnætur segir: „Sandra H. Andersen skapar sína upplifun á lífinu með skúlptúrum úr pappír, sem fer lag eftir lag, rétt eins og manneskjan sjálf. Þar sem ekkert er fullkomið og það óvenjulega er fallegt.“

Verk eftir Söndru.Aðsend

Lög manneskjunnar

„Öll þessi lög sem koma fram er svolítið eins og við sem manneskjur. Við höfum öll þessi lög af tilfinningum, hugsunum, upplifunum, og fleiru. Þetta gerir okkur okkur. Hvert lag hefur sinn tilgang. Sumt er á yfirborðinu, annað lendir undir. Við byggjumst upp lag fyrir lag. Mótun hvers og eins, með skuggum og skekkjum, tilfinningar sem finna sig ekki, reynsla sem raðast. Ekkert lag er eins. Hvert lag er mismunandi upplifun, tilfinning og hugsun, sem saman myndar heild,“ segir Sandra að lokum. 

Verk Söndru verða til sýnis á Menningarnótt í nýjum sýningarsal Sigurðar Sævars á Barónsstíg, þar sem Argentína steikhús var áður til húsa. Nánari upplýsingar má finna hér.


Tengdar fréttir

Heitasta listapar landsins býður í heimsókn

Listræna kærustuparið Saga Sigurðardóttir og Vilhelm Anton Jónsson ætla að veita gestum og gangandi innsýn í skapandi hugarheima sína á Menningarnótt með opinni vinnustofu. Blaðamaður heyrði í Sögu og fékk að heyra nánar frá þessum viðburði.

„Minnir mann á hvað þetta snýst allt um“

Fjöldin allur af fjölbreyttu fólki í ólíku formi kemur saman á laugardaginn og hleypur til styrktar mikilvægra málefna í Reykjavíkurmaraþoni Íslandsbanka. Lífið á Vísi tók púlsinn á nokkrum hlaupurum sem eru þekktir einstaklingar í samfélaginu. Þau fara ólíkar vegalengdir fyrir ólíkan málstað en eru sammála um samheldnina, fegurðina og gleðina sem einkennir þessa morgunstund á Menningarnótt.

Þétt dagskrá á langþráðri Menningarnótt í Reykjavík

Menningarnótt verður loksins haldin á ný þann 20. ágúst næstkomandi. Blaðamannafundur fór fram í dag þar sem dagskráin var kynnt ásamt ýmsum skemmtiatriðum. Vísir sýndi frá fundinum í beinni útsendingu. 

Allt sem þú þarft að vita um veisluna á Menningarnótt

Menningarnótt Reykjavíkurborgar verður haldin hátíðleg á morgun, þann 20. ágúst eftir langa bið og er dagskráin troðfull að vanda. Vísir setti saman stutt yfirlit með helstu upplýsingum og skemmtilegum viðburðum fyrir þau sem ætla að gera sér ferð í bæinn á þessum hátíðisdegi.






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.