Fótbolti

Jón Dagur mættur til Leuven

Runólfur Trausti Þórhallsson skrifar
Jón Dagur Þorsteinsson hefur samið við belgískt úrvalsdeildarlið.
Jón Dagur Þorsteinsson hefur samið við belgískt úrvalsdeildarlið. Vísir/Hulda Margrét

Íslenski landsliðsmaðurinn Jón Dagur Þorsteinsson er genginn í raðir belgíska félagsins Leuven. Jón Dagur kemur á frjálsri sölu eftir að hafa spilað með AGF í Danmörku undanfarin ár.

Jón Dagur var orðaður við urmul félaga eftir að hafa runnið á samningi í Danmörku en um helgina kom í ljós að Belgía væri líklegasti áfangastaður landsliðsmannsins.

Hinn 23 ára gamli Jón Dagur skrifar undir þriggja ára samning við Leuven sem rétt missti af sæti í úrslitakeppni belgísku úrvalsdeildarinnar á síðustu leiktíð. 

Rúnar Alex Rúnarsson lék með liðinu á láni frá Arsenal þá og ljóst er að það verður að minnsta kosti einn Íslendingur í herbúðum liðsins á komandi leiktíð.

Jón Dagur á að baki 21 A-landsleik fyrir íslenska landsliðið og hefur skorað í þeim fjögur mörk, tvö af þeim komu í júní síðastliðnum.




Fleiri fréttir

Sjá meira


×