Innlent

Munu kæra ef lögreglan heldur yfirheyrslum til streitu

Margrét Helga Erlingsdóttir skrifar
Þórður Snær Júlíusson, ritstjóri Kjarnans, segir að allir ættu að líta á framferði lögreglunnar með alvarlegum augum.
Þórður Snær Júlíusson, ritstjóri Kjarnans, segir að allir ættu að líta á framferði lögreglunnar með alvarlegum augum. Vísir/Egill Aðalsteinsson

Ritstjóri Kjarnans á ekki von á að lögreglustjórinn á Norðurlandi eystra muni halda til streitu yfirheyrslum á fjórum blaðamönnum eftir að héraðsdómur kvað upp úr um ólögmæti þess að einn þeirra yrði yfirheyrður með stöðu sakbornings. Hann segist munu kæra ef lögreglan geri slíkt.

Þórður ræddi við fréttastofu í hádegisfréttum Bylgjunnar.

Í úrskurði Héraðsdóms Norðurlands eystra var lögreglan gerð afturreka með framgöngu sína í garð blaðamannanna en þar kemur fram að í framlögðum gögnum lögreglu sé ekkert sem gefi tilefni til að ætla að myndbönd af kynferðislegum toga hafi farið í dreifingu. Gagnamóttaka sé ekki ólögleg. Blaðamennirnir hafi aðeins unnið fréttir upp úr þeim hluta gagnanna sem hafi átt erindi við almenning. Saksóknari hefur ákveðið að áfrýja niðurstöðunni til Landsréttar.

Þórður Snær Júlíusson, ritstjóri Kjarnans er einn fjögurra blaðamanna sem boðaður var í yfirheyrslu með stöðu sakbornings. Þórður telur að hann hafi sömu stöðu og Aðalsteinn Kjartansson, blaðamaður á Stundinni.

„Ég held að það sé alveg borðleggjandi að niðurstaðan í máli Aðalsteins nái yfir okkur Arnar Þór Ingólfsson blaðamann á Kjarnanum líka. Ef svo mjög ósennilega vildi til að lögreglan á Norðausturlandi myndi samt sem áður boða okkur í yfirheyrslu þá myndum við einfaldlega fara sömu leið og kæra málið.

Ásakanirnar ekki léttvægar

Í úrskurðinum segir að það eigi aldrei að vera léttvæg ákvörðun að veita fólki stöðu sakbornings. Slíkt geti skaðað orðspor viðkomandi og valdið óþægindum.

Hefur þetta haft mikil áhrif á þitt líf og þín störf?

„Þetta hefur auðvitað fyrst og síðast tekið mikinn tíma og orku í að verjast og útskýra eitthvað sem mér finnst algjörlega fjarstæðukennt. Auðvitað er ekkert skemmtilegt að sjá einhverjar samsettar myndir af mér og fólki sem vinnur með mér undir fyrirsögnum þar sem er verið að ásaka okkur um kynferðisbrot. Það er ekkert léttvægt fyrir neinn.“

Allir ættu að líta á framgöngu lögreglu með alvarlegum augum

Þórður segir málatilbúnað lögreglunnar það fjarstæðukenndan að hann óttast ekki framhaldið en framganga lögreglu sé mikið umhugsunarefni þegar horft sé á málið í stærra samhengi.

„Við höfum vitað það frá upphafi að þessar ávirðingar […] eru fjarstæðukenndar og eiga sér enga stoð í raunveruleikanum. Þess vegna erum við auðvitað bara mjög örugg með það að þetta mál muni ekki leiða til neinna afleiðinga fyrir okkur.“

Segir Þórður og bætir við líta þurfi á málið með hliðsjón af öðrum og stærri þáttum.

„En í stóru myndinni er það alvarlegt – og öllum ætti að finnast það alvarlegt – að svona ákvæði eins og var sett inn í lögin í fyrra sé nýtt í einhverjar veiðiferðir gagnvart blaðamönnum.“

Umhugsunarefni að dómsmál hafi þurft til

Aðspurður hvort málið hefði þýðingu fyrir stöðu fjölmiðlunar á Íslandi svaraði Þórður því til að miðað við niðurstöðu héraðsdóms þá væri búið gefa út skýr skilaboð.

„Að lögregla í rannsóknum sínum getur ekki að mjög illa undirbyggðu máli gefið blaðamönnum stöðu sakbornings með þeim hætti sem þeir ætluðu að gera núna. Það er ágætt að draga línu í sandinn en það að við þurftum raunverulega að fara í gegnum þetta ferli til að fá þá línu finnst mér umhugsunarvert.“


Tengdar fréttir

Sak­sóknari segir við­kvæma blaða­menn eiga heima í blóma­skreytingum

Lögregluembættið á Norðurlandi eystra var gripið í landhelgi þegar það gaf Aðalsteini Kjartanssyni blaðamanni réttarstöðu sakbornings og vildi yfirheyra hann sem slíkan. Héraðsdómur segir það ólögmætt. Lögregluembættið fyrir norðan ætlar að kæra úrskurðinn til Landsréttar.

Páleyju óheimilt að gera Aðalstein að sakborningi

Héraðsdómur Norðurlands eystra hefur úrskurðað í máli Aðalsteins Kjartanssonar blaðamanns á Stundinni en hann kærði þá ákvörðun lögreglunnar á Norðurlandi eystra að gera hann í sakborningi í máli sem snýr að eitrun og stuldi á síma Páls Steingrímssonar skipstjóra hjá Samherja. Niðurstaða dómarans er að Páleyju Borgþórsdóttur lögreglustjóra hafi verið það óheimilt.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.