„Eini munurinn sem ég sé er að ég er svört, ung dama“

Hin 15 ára gamla Valieva frá Rússlandi vann sigur í liðakeppni á Vetrarólympíuleikunum í síðustu viku og er langt komin með að vinna sigur í einstaklingskeppninni eftir frammistöðu sína í gær.

Valieva hefur fengið að keppa þrátt fyrir að hafa fallið á lyfjaprófi á rússneska meistaramótinu í desember, en niðurstöður úr því prófi bárust ekki fyrr en eftir liðakeppnina í síðustu viku.

Valieva greindist með árangursaukandi hjartalyf en hefur þó fengið að halda áfram keppni í Peking eftir að alþjóða íþróttadómstóllinn hafnaði kröfu um tímabundið bann, meðal annars á þeim forsendum að Valieva hefði ekki náð 16 ára aldri.

Fékk ekki að keppa vegna kannabisneyslu

Richardson furðar sig á þessu en hún féll á lyfjaprófi síðasta sumar, í aðdraganda Ólympíuleikanna í Tókyó, eftir að hafa unnið 100 metra hlaupið í bandarísku undankeppninni.

Richardson greindist með kannabis en deilt hefur verið um hvort að kannabis geti talist árangursaukandi og hvort það eigi að vera á bannlista alþjóða lyfjaeftirlitsins.

„Getum við fengið almennilegt svar við muninum á hennar [Valievu] aðstæðum og mínum?“ skrifaði Richardson á Twitter á mánudaginn.

Hún benti á að líkt og Valieva hefði hún átt góðan möguleika á verðlaunum, og segist aðeins hafa neytt kannabiss þegar hún syrgði móður sína.

„Móðir mín dó og ég gat ekki hlaupið, og ég var einnig talin líkleg til að lenda í efstu þremur sætum. Eini munurinn sem ég sé er að ég er ung, svört dama,“ skrifaði Richardson og bætti við:

„Hún féll í desember en það er rétt núna sem að niðurstöðurnar eru birtar, en nafni mínu og hæfileikum var slátrað,“ skrifaði Richardson.

IOC segir málin ólík

Alþjóða ólympíunefndin, IOC, svaraði í dag og sagði mál Valievu og Richardson vera ólík.

„Hvert mál er einstakt. Hún [Richardson] greindist jákvæð 19. júní [2021], þegar nokkuð var í að leikarnir í Tókýó hæfust,“ sagði Mark Adams, talsmaður alþjóða ólympíunefndarinnar, en leikarnir í Tókyó hófust 23. júlí.

„Hennar niðurstaða kom nógu snemma til að USADA [bandaríska lyfjaeftirlitið] gæti brugðist við í tæka tíð fyrir leikanna. Richardson samþykkti eins mánaðar bann sem hófst 28. júní,“ sagði Adams og bætti við að hann teldi málin ekki mjög lík.