Birkir sat á bekknum er liðið datt út í vítaspyrnukeppni

Wilson Eduardo kom heimamönnum í Alanyaspor yfir á 22. mínútu áður en Erhun Oztumer jafnaði metin fyrir Demirspor stuttu fyrir hálfleik.

Staðan var því 1-1 þegar gengið var til búningsherbergja. Hún var enn óbreytt að venjulegum leiktíma loknum og því þurfti að framlengja.

Efkan Bekiroglu fékk tækifæri til að koma heimamönnum yfir af vítapunktinum í uppbótartíma fyrri hálfleiks framlengingarinnar, en klikkaði á spyrnu sinni. Staðan var því enn 1-1 að framlengingu lokinni og því þurfti að grípa til vítaspyrnukeppni til að skera úr um sigurvegara.

Þar reyndust heimamenn sterkari, en þeir skoruðu úr fjórum spyrnum gegn aðeins tveimur spyrnum gestanna í Adana Demirspor. Alanyaspor er því á leið í átta liða úrslit tyrknesku bikarkeppninnar, en Birkir Bjarnason og félagar sitja eftir með sárt ennið.