Erlent

Var­að­i við kjarn­ork­u­stríð­i í Evróp­u

Samúel Karl Ólason skrifar
Vladimír Pútín og Emmanuel Macron, forsetar Rússlands og Frakklands.
Vladimír Pútín og Emmanuel Macron, forsetar Rússlands og Frakklands. AP/Sputnik

Vladimír Pútín, forseti Rússlands, segist ætla að gera sitt besta til að finna málamiðlun á deilum Rússa við Atlantshafsbandalagið og Úkraínu. Hann varaði þó við því að ef Úkraína eða Atlantshafsbandalagið myndi reyna að frelsa Krímskaga myndi það leiða til kjarnorkustríðs sem enginn myndi vinna.

Hann sagðist gera sér grein fyrir því að NATO væri máttugra en Rússland þegar kæmi að hefðbundnum hernaði en Rússlandi væri eitt stærsta kjarnorkuveldið. Þá sagði Pútín, samkvæmt frétt RIA fréttaveitunnar, að ef Úkraína myndi reyna að ná Krímskaga aftur myndi öll Evrópa dragast inn í stríðið á augabragði.

Þetta sagði Pútín eftir fund með Emmanuel Macron, forseta Frakklands. Báðir lýstu þeir fundinum sem jákvæðum og Pútín sagði tillögur Macrons raunsæjar og hægt væri að nota þær til frekari viðræðna, samkvæmt frétt DW.

Rússland gerði innrás í Úkraínu árið 2014 og innlimaði Krímskaga af ríkinu. Þá hafa aðskilnaðarsinnar í austurhluta landsins, sem studdir eru af Rússlandi, lagt undir sig svæði.

Nú hafa Rússar sent gífurlegan fjölda hermanna að landamærum Úkraínu og krefjast þess að ríkinu verði meinaður aðgangur að Atlantshafsbandalaginu um alla tíð. Þá hefur ríkisstjórn Pútíns einnig krafist þess að ríkjum Austur-Evrópu verði vísað úr bandalaginu en báðum kröfunum hefur verið hafnað.

Pútín sagðist þó ekki þeirrar skoðunar að viðræðum væri lokið.

Olaf Scholz, kanslari Þýskalands, og Joe Biden, forseti Bandaríkjanna.AP/Alex Brandon

Á meðan Pútín og Macron funduðu í Moskvu, funduðu Joe Biden, forseti Bandaríkjanna, og Olaf Scholz, kanslari Þýskalands, í Hvíta húsinu í Washington D.C. og var sama málefni til umræðu þar. Ráðamenn í Bandaríkjunum hafa lýst yfir sífellt meiri áhyggjum vegna mögulegrar innrásar Rússa í Úkraínu.

Samhliða því hefur Biden unnið að því að fylkja bandamönnum Bandaríkjanna í Evrópu um harðar refsiaðgerðir gegn Rússlandi komi til innrásar. NATO mun ekki styðja Úkraínu með beinum hætti en hafa verið að senda vopn til ríkisins.

Eftir fund Bidens og Scholz sagði forsetinn að ef til innrásar kæmi myndu Þjóðverjar ekki taka Nord Stream 2 gasleiðsluna í notkun. Það er ný gasleiðsla frá Rússlandi til Þýskalands en ríki Evrópu reiða sig að miklu leyti á gassendingar frá Rússlandi til orkuframleiðslu og húshitunar.

„Það er nauðsynlegt fyrir Rússa að skilja að mun meira gæti gerst en þeir hafa gert sér grein fyrir,“ sagði Scholz um mögulegar refsiaðgerðir, samkvæmt AP fréttaveitunni.

Ummæli sem vöktu athygli

Ummæli Pútíns um Minsk-sáttmálann sem gerður var milli ríkisstjórnar Úkraínu og aðskilnaðarsinnanna að ekkert annað væri í boði en að virða hann, hafa vakið mikla umræðu. Pútín sagði að hvort sem Úkraínumönnum líkaði við hann eða ekki, þyrftu þeir að sætta sig við hann.

Margir hafa vakið athygli á því að Pútín virtist hafa vitnað í gamalt rússneskt pönk-lag sem fjallar um náriðlun. Eins og blaðamaður Guardian bendir á í tístinu hér að neðan er það þó ekki ljóst og er tiltækið sagt hafa verið lengi í notkun.


Tengdar fréttir

Segja Rússa „70 prósent til­búna“ til inn­rásar

Rússland hefur nú náð að byggja upp um 70 prósent af því hernaðarlega afli sem þarf til þess að geta ráðist af fullum mætti inn í Úkraínu, að mati bandarískra embættismanna. Þeir búast við að Rússar styrki sig enn frekar á næstu dögum.

Segir rússneskum hermönnum í Hvíta-Rússlandi hafa fjölgað hratt

Her Rússlands hefur flutt um þrjátíu þúsund hermenn og nútímavopn til Hvíta-Rússlands á undanförnum dögum. Þetta eru stærstu mannaflutningar Rússa til Hvíta-Rússlands frá tímum Sovétríkjanna, samkvæmt Jens Stoltenberg, yfirmanni Atlantshafsbandalagsins.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×