Tíska og hönnun

Hönnuðurinn Thierry Mu­gler er látinn

Atli Ísleifsson skrifar
Thierry Mugler hannaði á síðustu árum fatnað meðal annars fyrir þær Beyoncé, Lady Gaga og Kim Kardashian.
Thierry Mugler hannaði á síðustu árum fatnað meðal annars fyrir þær Beyoncé, Lady Gaga og Kim Kardashian. Getty

Franski hátískuhönnuðurinn Thierry Mugler er látinn, 73 ára að aldri. Umboðsmaður Mugler segir hann hafa látist í gær af náttúrulegum orsökum.

Mugler var mjög áhrifmikill á níunda áratugnum og átti hönnun hans, sem einkenndist af herðabreiðum fatnaði og skörpum línum með vísunum aftur til fimmta og sjötta áratugarins, eftir að eiga þátt í að skilgreina fatastíl þess áratugar.

Í frétt BBC segir að í seinni tíð hafi Mugler verið einna helst þekktur fyrir ilmvötn sín en hann hannaði þó einnig fjölda kjóla á stórstjörnur á borð við Beyoncé, Lady Gaga og Kim Kardashian.

Hann rataði einnig í fréttir á síðustu árum vegna slysa sem varð til þess að hann gekk undir nokkrar lýtaaðgerðir á andliti.

Síðar í þessari viku stóð til að Mugler myndi kynna nýtt samstarf, segir umboðsmaðurinn Jean-Baptiste Rougeot.

Mugler fæddist í Strasbourg í desember 1948 og fluttist tvítugur til Parísar þar sem hann stofnaði eigið merki, Cafe de Paris árið 1973. Ári síðar stofnaði hann svo merkið Thierry Mugler.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.