Öðrum leik Tottenham frestað vegna hópsmitsins

Leik Tottenham og Rennes sem átti að fara fram í kvöld var frestað eftir að átta leikmenn og fimm úr starfsliði Tottenham greindust með kórónuveiruna, og nú hefur enska úrvalsdeildin ákveðið að gera slíkt hið sama varðandi leik Tottenham og Brighton næsta sunnudag.

Lundúnaliðið neyddist til að loka æfingasvæði aðalliðsins í gær, og í yfirlýsingu frá ensku úrvalsdeildinni kemur fram að ákvörðunin hafi verið tekin með heilsu leikmanna og starfsfólks í huga.

Þá kemur einnig fram að enn sé unnið í því að finna nýja dagsetningu fyrir leikinn. Þetta er annar leikur Tottenham sem er frestað í ensku úrvalsdeildinni á stuttum tíma, en leik liðsins gegn Burnley sem átti að fara fram þann 28. nóvember var frestað vegna mikillar snjókomu.