Lífið

Mættu of snemma á Bond og byrjuðu á endanum

Kolbeinn Tumi Daðason skrifar
Sumir segja að það borgi sig að mæta of seint í bíó, sérstaklega þeir sem vilja sleppa við auglýsingar og sýnishorn úr öðrum myndum. Aðrir myndu jafnvel segja að í upphafi skuli endi Bond-myndar skoða. Sá hópur er þó varla fjölmennur.
Sumir segja að það borgi sig að mæta of seint í bíó, sérstaklega þeir sem vilja sleppa við auglýsingar og sýnishorn úr öðrum myndum. Aðrir myndu jafnvel segja að í upphafi skuli endi Bond-myndar skoða. Sá hópur er þó varla fjölmennur. Vísir/Vilhelm

Gestir á sexsýningu á James Bond myndinni No Time to Die í Háskólabíó í gær urðu þess varir þegar par á miðjum aldri gekk inn í salinn þegar um stundarfjórðungur var eftir af myndinni og spennan að ná hámarki. Fljótlega kom í ljós að parið var á réttum stað en á röngum tíma.

No Time to Die er sýnd í Háskólabíó klukkan 18 og svo aftur klukkan 20:30. Vel var liðið á myndina þegar parið, vopnað að því er virtist stórum popp og gos af sömu stærð, gekk inn í myrkvaðan salinn. Þau virkuðu mjög spennt, flýttu sér að finna sér sæti og var augljóst að þau töldu sig vera örlítið of sein á sýninguna.

Konan var klædd í glæsilega dúnúlpu og eftir um fimm mínútna veru í salnum, þegar von hefði staðið til að þau hefðu áttað sig á því að myndin væri ekki nýhafin heldur langt komin, klæddi hún sig úr úlpunni og kom sér betur fyrir.

Eins og verða vill í spennumyndum, og eru Bond-myndir engin undantekning, gerast hlutir undir lok mynda þar sem öllum má vera ljóst að myndinni er að ljúka. Til að eyðileggja ekki fyrir væntanlegum áhorfendum myndarinnar verður ekki sagt nánar frá því atriði. Það varð þó til þess að parið áttaði sig á því að það hafði byrjað Bond á öfugum enda. Þau drifu sig því upp úr sætum sínum og flýttu sér út.

Fólkinu til varnar er rétt að taka fram að upphafsatriði í Bond geta verið dálítið tilviljanakennd, mikið um að vera og má ætla að fólkið hafi talið sig vera að horfa á slíkt atriði. Vonandi nutu þau næstu sýningar á myndinni sem hófst klukkan 20:30.

No Time to Die hefur fengið nokkuð góð viðbrögð hjá gagnrýnendum. Fjallað var um myndina og þróun James Bond í Pallborðinu á Vísi í gær. Þáttinn má sjá að neðan.


Tengdar fréttir

„Ég hitti Daniel Cra­ig og hann er draug­leiðin­legur“

Þrír af helstu sérfræðingum í James Bond á Íslandi kunnu vel að meta No Time to Die, nýjustu myndina um einkaspjæjara hinnar hátignar. Einn hefur hitt Daniel Craig, sem lék Bond í fimmta og síðasta skiptið í myndinni, og ber honum ekki vel söguna.

No Time to Die: Gamli fær verðskuldað frí

Svanasöngur Daniels Craig í hlutverki James Bond, leynilega þjóns hennar hátignar, er nú kominn í kvikmyndahús. Almennt hafa viðtökurnar verið mun jákvæðari en á síðustu Bond-mynd, Spectre.






Fleiri fréttir

Sjá meira


×