Enski boltinn

Mendy enn í steininum eftir að þriðju beiðninni um lausn gegn tryggingu var hafnað

Ingvi Þór Sæmundsson skrifar
Benjamin Mendy situr í fangelsi í Liverpool.
Benjamin Mendy situr í fangelsi í Liverpool. getty/James Gill - Danehouse

Benjamin Mendy, leikmaður Englandsmeistara Manchester City, situr enn í steininum eftir að beiðni hans um að losna gegn tryggingu var hafnað í þriðja sinn.

Mendy hefur verið í gæsluvarðhaldi undanfarnar sjö vikur eftir að hann var handtekinn vegna meintra kynferðisbrota.

Frakkinn situr inni í HMP Altcourse fangelsinu í Liverpool. Settur dagur fyrir réttarhöld hans er 24. janúar á næsta ári.

Mendy var ákærður fyrir að beita þrjár konur kynferðislegu ofbeldi á heimili sínu í Chester í fyrra og í byrjun þessa árs. Ein kvennannna var yngri en átján ára. Þá var hann ákærður fyrir að nauðga konu í ágúst á þessu ári.

Hinn 27 ára Mendy var í byrjunarliði City í 1-0 tapi fyrir Tottenham í 1. umferð ensku úrvalsdeildarinnar. Svo gæti farið að það hafi verið hans síðasti leikur fyrir félagið.

Mendy kom til City frá Monaco 2017. Hann hefur unnið fjölda titla með Manchester-liðinu þótt hann hafi lítið spilað með því vegna meiðsla.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.