Gular viðvarnir gefnar út vegna leifa fellibylsins Larry

Atli Ísleifsson skrifar 10. september 2021 14:03

Viðvaranirnar taka gildi klukkan 18 á sunnuudagskvöld. Veðurstofan

Veðurstofan hefur gefið út gular viðvaranir vegna hvassrar suðvestanáttar sem mun herja á landsmenn á suður og vesturhluta landsins á sunnudagskvöld og fram á mánudag.

Eiríkur Örn Jóhannesson, veðurfræðingur á Veðurstofunni, segir að um sé að ræða leifar fellibylsins Larry sem fór yfir Karíbahafseyjar í byrjun mánaðar og norður austurströnd Bandaríkjanna og Kanada.

Gular viðvaranir hafa verið gefnar út fyrir höfuðborgarsvæðið, Suðurland, Faxaflóa, Breiðafjörð, Suðausturland og Miðhálendi og taka gildi klukkan 18 á sunnudag og gilda til klukkan 11 á mánudagsmorgun.

„Þessu fylgir svolítill vindstrengur og talsverð úrkoma. Við höfum alveg séð meiri vind síðustu daga en reiknum þarna með 15 til 20 metrum á sekúndu á höfuðborgarsvæðinu og upp í storm í öðrum þeim landshlutum þar sem viðvaranir hafa verið gefnar út,“ segir Eiríkur Örn.

Hann segir að það verði „ágætis vindur“, en að áhrifin gætu orðið meiri vegna árstímans, þar sem margir séu enn með garðhúsgögn og trampólín úti í garði.

Veður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.