Andri Lucas: Æðisleg tilfinning að heyra alla í stúkunni fagna þessu með mér

„Þetta var æðislegt og að vera partur af þessu. Auðvitað var þetta ekki okkar besti leikur og sloppí fyrri hálfleikur. Hægt og rólega náðum við að koma okkur aftur inn í leikinn í seinni hálfleik. Við sem komum inn á vorum klárir í slaginn,“ sagði Andri Lucas Guðjohnsen í viðtali við Eddu Sif Pálsdóttur á RÚV.

„Við náðum að skora rétt áður en ég kem inn á og svo geri ég bara mitt besta til að hjálpa liðinu og næ að skora. Þetta var æðisleg upplifun,“ sagði Andri Lucas en hvernig var fyrsta markið með íslenska landsliðinu?

„Sérstaklega að gera þetta heima á Laugardalsvellinum. Það er æðisleg tilfinning að heyra alla í stúkunni fagna þessu með mér. Ég er orðlaus. Þetta er geggjað,“ sagði Andri Lucas.

Andri fékk koss frá föður sínum Eiði Smára Guðjohnsen þegar hann kom inn á í sinn fyrsta landsleik á móti Rúmeníu.

„Þetta var svona faðir-sonur stund. Pabbi minn er aðstoðarþjálfari og við reyndum að halda þessu eins fagmannlegu og við getum. Hann var bara stoltur að sjá son sinn koma inn á og spila sinn fyrsta landsleik,“ sagði Andri.

Man ekkert eftir kossinum

„Ef ég á að vera alveg hreinskilinn þá man ég ekkert eftir þessu. Ég var að einbeita mér að leiknum og sjá hvað var að fara að gerast. Ég man ekki eftir þessu en það var gaman að sjá þetta á myndbandi eftir á,“ sagði Andri.

Andri býst ekkert endilega við því að fá að byrja næsta leik á móti Þýskalandi. Hann vissi heldur ekki hver valdi númerið 22 fyrir hann.

„Ég vissi ekki að talan mín væri 22. Ég labbaði bara inn í klefa fyrir leikinn á móti Rúmeníu og sjá bara treyju númer 22 með Guðjohnsen á bakinu. Kannski var smá pressa þegar maður sá þetta fyrst en þegar maður fer síðan út á völlinn þá er maður ekkert að pæla í því,“ sagði Andri.