Keppandi á Ólympíumóti fatlaðra fluttur á sjúkrahús með veiruna

Kórónaveirusmit tengd mótinu eru nú orðin 184 talsins, en þetta er fyrsti keppandinn sem fluttur er á sjúkrahús vegna veirunnar. Aðeins 13 þessara smita hafa greinst innan Ólympíuþorpsins.

Í dag, fimmtudag, greindust 24.900 ný smit í Japan, og þar af voru 4.700 í höfuðborginni Tókýó. Útbreiðsla kórónaveirunnar í Tókýó og nágrenni hefur farið vaxandi síðustu daga og vikur.

Þess ber þó að geta að allir þeir sem koma að mótinu eru skimaðir daglega og að gríðarlega umfangsmiklar varúðarráðstafanir vegna kórónaveirunnar eru í gildi.