Enski boltinn

De Gea stytti sumarfríið og er klár í baráttuna

Anton Ingi Leifsson skrifar
Axel Tuanzebe og Daniel James reyna að hughreysta David de Gea eftir tapið gegn Villareal í Evrópudeildinni í vor.
Axel Tuanzebe og Daniel James reyna að hughreysta David de Gea eftir tapið gegn Villareal í Evrópudeildinni í vor. Getty/Maja Hitij

David de Gea, markvörður Manchester United og spænska landsliðsins, tekur sér ekki langt frí eftir Evrópumótið í sumar.

De Gea mun snúa aftur til Manchester í þessari viku eftir einungis tvær vikur í fríi eftir að hafa setið á bekknum hjá Spáni á EM í sumar.

Spánverjinn var nefnilega orðinn markvörður númer tvö hjá Ole Gunnar Solskjær undir lok síðustu leiktíðar og Dean Henderson hafði tekið stöðuna hans.

De Gea vill, eðlilega, spila meira og því hefur hann ákveðið að snúa aftur fyrr en áætlað var til þess að berjast við Henderson um stöðuna.

De Gea átti fyrst, samkvæmt plönum, að snúa aftur í byrjun ágúst en samkeppnin gerir það að verkum að hann mun verða mættur á Carrington, æfingasvæði United, í næstu viku.

Spænski markvörðurinn hafði verið orðaður við PSG en nú er það úr sögunni eftir að félagið krækti í Evrópumeistarann Gianluigi Donnarumma.




Fleiri fréttir

Sjá meira


×