Innlent

Hagað sér eins og rann­sóknar­lög­regla með fyrir­fram gefna niður­stöðu

Eiður Þór Árnason skrifar
Uhunoma og Tristan Már, átta mánaða fósturbróðir hans.
Uhunoma og Tristan Már, átta mánaða fósturbróðir hans. Stöð 2

Mál nígeríska hælisleitandans Uhunoma Osayomore gegn íslenska ríkinu var þingfest í Héraðsdómi Reykjavíkur í morgun en þar er krafist ógildingar á nýlegum úrskurði kærunefndar útlendingamála.

Þann 9. apríl staðfesti kærunefndin þá ákvörðun Útlendingastofnunar að synja Uhunoma um alþjóðlega vernd og dvalarleyfi af mannúðarástæðum. Honum voru þá gefnir þrjátíu dagar til að yfirgefa landið sjálfviljugur en að þeim tíma liðnum er hægt að vísa honum úr landi.

Málið var þingfest í Héraðsdómi Reykjavíkur.Vísir/vilhelm

Í stefnunni sem þingfest var í dag er einkum byggt á því að Uhunonma hafi á engu stigi fengið málsmeðferð hjá stjórnvöldum sem fórnarlamb mansals þrátt fyrir að upphafleg frásögn hans hjá Útlendingastofnun hafi gefið sterklega til kynna að hann væri slíkt fórnarlamb.

Fram kemur í tilkynningu frá Magnúsi Davíð Norðdahl, lögmanni Uhunonma, til fjölmiðla að einnig sé byggt á því að mat stjórnvalda á aðstæðum í Nígeríu fyrir þolendur mansals og kynferðislegs ofbeldis og þá sem þurfi á geðheilbrigðisaðstoð að halda sé rangt og óforsvaranlegt. Þá sé Uhunoma engan veginn öruggur komi til endursendingar til Nígeríu.

Flúið Nígeríu vegna ofsókna

Uhunoma kom til Íslands árið 2019 og segist hafa flúið Nígeríu vegna alvarlegs ofbeldis og ofsókna af hálfu föður síns, sem sé vel tengdur inn í nígerísku lögregluna. Faðirinn hafi jafnframt ráðið móður hans bana. Þá kveðst Uhunoma vera þolandi mansals og kynferðisofbeldis, auk þess sem hann hefur glímt við mikil andleg veikindi.

Fram kemur í aðsendri grein eftir íslenska vini hans sem birtist á Vísi fyrir tæpri viku að kærunefnd útlendingamála hafi metið sögu Uhunoma „ótrúverðuga“ og aðstæður í heimalandinu Nígeríu „ekki nægilega „slæmar““ til að réttlæta alþjóðlega vernd eða dvalarleyfi á grundvelli mannúðarsjónarmiða á Íslandi. Úrskurðurinn hefur ekki verið birtur opinberlega.

Uhunoma sagði sögu sína í kvöldfréttum Stöðvar 2 í febrúar. Horfa má á viðtalið hér fyrir neðan.

Viðtölum ekki stýrt af fagaðilum

Í stefnu Uhunoma þar sem farið er fram á ógildingu úrskurðarins er harðlega gagnrýnt hvernig kærunefnd útlendingamála hafi dregið trúverðugleika hans í efa.

„Hann er látinn gjalda þess að hafa á fyrri stigum hjá Útlendingastonfun einungis greint frá sumum en ekki öllum þeim tilvikum sem hann var seldur mansali í lífi sínu, sérstaklega þegar hann var mansalsfórnarlamb í Bretlandi á barnsaldri,“ segir Magnús, lögmaður Uhunoma.

„Þá kýs kærunefnd útlendingamála að byggja á upplýsingum úr fölsku vegabréfi, sem gerendur í mansalsmálinu nýttu til að koma Uhunoma til Bretlands á þeim tíma. Það er alþekkt og mjög skiljanlegt að mansalsfórnarlömb eiga erfitt með að greina frá öllum áföllum sínum og því er mælst til þess að fagaðilar stýri viðtölum við svo viðkvæma hópa. 

Sú var ekki raunin, hvorki hjá Útlendingastofnun né hjá kærunefnd útlendingamála. Stefnandi hefur hins vegar að eigin frumkvæði sótt viðtalsmeðferð hjá Stígamótum og lagt fram gögn þess efnis sem kærunefnd útlendingamála kýs að líta framhjá.“

Látinn gjalda þess að hafa tekið upp vestrænt gælunafn

Jafnframt er fullyrt í stefnunni að kærunefnd útlendingamála hafi látið Uhunoma gjalda þess að hafa tekið upp vestrænt gælunafn við komuna til Evrópu og nýtt það til að draga trúverðugleika hans í efa.

Magnús Davíð Norðdahl, lögmaður Uhunoma.Aðsend

„Þessi viðleitni Uhunoma er gríðarlega algeng hjá fólki sem kemur frá framandi löndum og kýs að nota nafn sem auðveldara að bera fram. En það er eins og kærunefnd útlendingamála setji sig í stellingar rannsóknarlögreglu og reyni eftir fremsta megni að vefengja trúverðugleika Uhunoma Osayomore að því er virðist í þeim tilgangi einum að styðja þá fyrirfram teknu ákvörðun að synja honum um vernd,“ segir Magnús.

Er það álit hans að málsmeðferðarbrot stjórnvalda í máli Uhunoma séu það „alvarleg og víðtæk“ að héraðsdómi geti ekki annað en að ógilt úrskurð kærunefndar útlendingamála.

Lagður inn á bráðageðdeild

Í áðurnefndi grein sem skrifuð var af vinum Uhunoma segir að úrskurður kærunefndarinnar hafi reynst honum mikið áfall.

„Hann kveið úrskurðarins og svaf lítið sem ekkert dagana á undan og alls ekkert í kjölfarið. Á sunnudag var hann svo lagður inn á bráðageðdeild í mjög slæmu ástandi, illa haldinn af þunglyndi, kvíða, áfallastreituröskun auk þess sem talin var hætta á því að hann veitti sjálfum sér skaða,“ segja vinirnir í pistli sínum.

Fyrr á þessu ári söfnuðust tæplega 47 þúsund undirskriftir þar sem fyrirhugaðri brottvísun Uhunoma var mótmælt.

Magnús er bjartsýnn á að Héraðsdómur Reykjavíkur taki undir sjónarmið þeirra.

„Ég trúi því staðfastlega að mál þetta fái jákvæðan endi og að Uhnoma fái tækifæri til að setjast hér að, upplifa áður óþekkt öryggi og leggja sitt af mörkum og taka þátt í íslensku samfélagi.“


Tengdar fréttir

U­hunoma synjað um land­vistar­leyfi af Kæru­nefnd út­lendinga­mála

Kærunefnd útlendingamála tók síðastliðinn föstudag fyrir mál Nígeríumannsins Uhunoma Osayomore. Niðurstaða nefndarinnar var sú að hún staðfesti eldri ákvörðun Útlendingastofnunar um að synja umsókn hans um alþjóðlega vernd hér á landi og dvalarleyfi á grundvelli mannúðarsjónarmiða.

Mótmæltu brottvísun Uhunoma

Á annað hundrað stuðningsmanna og vina Uhunoma Osayomore frá Nígeríu kom saman á Arnarhóli klukkan 16:15 í dag til að mótmæla brottvísun hans frá Íslandi. Honum hefur verið synjað um alþjóðlega vernd og dvalarleyfi hér á landi.

Í á­falli allan gær­daginn eftir að reynt var að vísa fóstur­syninum úr landi

Ungur Nígeríumaður sem til stendur að vísa úr landi óttast um öryggi sitt í heimalandinu eftir að hafa sætt mansali og kynferðisofbeldi. Hann hefur eignast fjölskyldu og góða vini á Íslandi sem bíða nú milli vonar og ótta eftir endanlegri niðurstöðu í máli hans. Sjálfskipuð fósturmóðir hans segist hafa verið í áfalli allan gærdaginn eftir að lögregla bankaði upp á til að vísa honum úr landi.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.