Í á­falli allan gær­daginn eftir að reynt var að vísa fóstur­syninum úr landi

Uhunoma Osayomore lagði á flótta frá Nígeríu á barnsaldri og kom hingað til lands í október 2019. Hann segist þolandi mansals og kynferðisofbeldis og glími auk þess við alvarleg andleg veikindi.

Honum hefur verið synjað um alþjóðlega vernd og dvalarleyfi á Íslandi og verður að óbreyttu vísað úr landi. Lögmaður Uhunoma telur mat stjórnvalda þess efnis að hann sé öruggur í Nígeríu óforsvaranlegt.

„Og bara til að taka geðheilbrigðismálin, það eru þrjú hundruð geðlæknar starfandi í Nígeríu sem eru að sinna þjóð sem telur meira en tvö hundruð milljón manns. Þetta er sambærilegt við það ef við Íslendingar ættum að sammælast um það að nýta einn geðlækni, sem væri aukinheldur í hálfu starfi,“ segir Magnús D. Norðdahl, lögmaður Uhunoma.

Alsettur örum eftir barsmíðar föðurins

Saga Uhunoma er átakanleg en hann segist hafa flúið Nígeríu vegna alvarlegs ofbeldis og ofsókna af hálfu föður síns, sem sé vel tengdur inn í nígerísku lögregluna. Hann segir föður sinn jafnframt hafa ráðið móður hans bana.

„Vegna þess að ég grét sagði pabbi minn við mig að ég ætti ekki að hafa áhyggjur, hann myndi ekki lemja mig aftur. „Ekki hafa áhyggjur, ég mun gera allt betra. Ég mun ekki lemja þig aftur.“ En hann hætti aldrei. Ég er alsettur örum um allan líkamann sem hann veitti mér,“ segir Uhunoma.

Saknar fjölskyldunnar þegar hann skýst út

Uhunoma flúði Nígeríu og segist svo hafa verið hnepptur í vinnumansal í Líbýu. Þar hafi honum ítrekað verið nauðgað af manni sem hann vann fyrir. Uhunoma komst loks til Ítalíu og þaðan til Íslands. Síðustu mánuði hefur hann búið hjá sex manna fjölskyldu í Reykjavík, sem hann lítur nú á sem sína eigin.

„Ef ég er úti og kem ekki heim sakna ég þeirra þessara klukkutíma sem ég er úti. Í gær sagði lögreglan að hún ætlaði að koma og vísa mér úr landi. Þannig að ég er mjög hræddur,“ segir Uhunoma.

Var í áfalli allan gærdaginn

Fósturmóðir Uhunoma segir hann orðinn einn af fjölskyldunni og hafi sérstaklega tengst yngsta barninu, hinum átta mánaða Tristani, sterkum böndum. En hún hefur áhyggjur af framtíðinni.

„Ég er mjög hrædd. Ég var í áfalli í allan dag í gær,“ segir Morgane Priet-Mahéo, fósturmamma Uhunoma. Lögregla bankaði upp á hjá fjölskyldunni í gær í þeim erindagjörðum að vísa Uhunoma úr landi.

„Hann er að springa. Þegar hann var á Ítalíu var ekki hægt að tala um það sem gerðist, það var búið að stríða honum um kynferðisofbeldi sem hann upplifði svo hann er búinn að halda öllu inni.“

Uhunoma unir sér vel á Íslandi; þeytist um á rafskútunni sinni, kíkir á kaffihús og skoðar föt í Kringlunni. Hann dreymir um framtíð hér; nám og starfsferil.

„Jafnvel þótt ég verði látinn vinna í tuttugu ár, bara til að vera frjáls á Íslandi, þá er ég tilbúinn til þess.“

Viðtal kvöldfrétta Stöðvar 2 við Uhnoma og Morgane fósturmóður hans má horfa á í spilaranum ofar í fréttinni.