„Nauð­syn­legt fyrir okkur til að geta hafið undir­búning fyrir undan­keppnina í haust“

Markvörðurinn Telma Ívarsdóttir og varnarmaðurinn Hafrún Rakel Halldórsdóttir eru nýliðar í íslenska hópnum. Þær leika báðar með Breiðabliki. Þær verðskulda sæti í hópnum að mati landsliðsþjálfarans.

„Þær eru bara á þeim stað að þær eiga þetta skilið. Held að það sé svona í grunninn þannig að þær hafa unnið fyrir þessu og eru góðir leikmenn.“

„Það var raunverulega bara Ingibjörg. Hún gat ekki verið út af sóttvarnarreglum í Noregi. Það er tíu daga sóttkví þegar hún kemur til baka svo það var ekki möguleiki að fá hana,“ sagði Þorsteinn um fjarveru landsliðsmiðvarðarins Ingibjörgu Sigurðardóttur sem leikur með Noregsmeisturum Lilleström.

Um æfingaleikinn gegn Ítalíu

Ísland mætir Ítalíu þann 13. apríl næstkomandi. Það verður fyrsti leikur Íslands undir stjórn Þorsteins en hann birti fyrsta landsliðshóp sinn í dag.

„Það var nauðsynlegt að ég held. Við slepptum verkefni síðast þannig þetta var nauðsynlegt fyrir okkur til að geta hafið undirbúning fyrir undankeppnina í haust.“

„Þetta skiptir allt máli, helst allt í hendur. Auðvitað þurfa liðin að hittast til að halda dampi og halda áfram að þróast. Fyrir mig sem nýjan þjálfara þá var þetta ákveðið grundvallaratriði held ég.“

Um markvarðarstöðuna

„Þetta lítur bara vel út. Erum með Söndru sem er leikreynd og búin að standa sig vel undanfarin ár. Cecilía Rán [Rúnarsdóttir] er efnilegur markvörður, á einn landsleik og hefur verið á góðu róli. Telma er líka á réttu róli og svo eru fleiri markmenn vonandi sem eru að koma upp.“

„Ef hún fær að spila og halda áfram að þróast held ég að þetta sé gott skref, hjálpar okkar vonandi líka með því. Ég held að þetta sé jákvætt – að hún hafi átt möguleika á að taka þetta skref. Eins og ég segi, í grunninn þarf hún bara að fá að spila og ef hún gerir það er þetta bara gott mál,“ sagði Þorsteinn um vistaskipti Cecilíu til Örebro í Svíþjóð.

Markmið þjálfarans í komandi landsliðsverkefni

„Kynnast leikmönnum, koma mínum hugmyndum á framfæri og hvernig ég mun spila. Byrja bara að vinna með það. Ferðin snýst mest megnis um að koma hlutum á framfæri og vinna með það,“ sagði Þorsteinn Halldórsson að lokum.