Innlent

„Mín tilfinning að fólki sé bara sama“

Sunna Karen Sigurþórsdóttir skrifar
Jónína Margrét ákvað hefja heimakennslu vegna einkenna tólf ára dóttur hennar sem rakin eru til myglu. Stelpan hafði verið orkulaus og verkjuð um nokkurt skeið. Núna er hún hins vegar heilsuhraust og farin að stunda íþróttir aftur. 
Jónína Margrét ákvað hefja heimakennslu vegna einkenna tólf ára dóttur hennar sem rakin eru til myglu. Stelpan hafði verið orkulaus og verkjuð um nokkurt skeið. Núna er hún hins vegar heilsuhraust og farin að stunda íþróttir aftur.  Vísir/Arnar Halldórsson

Foreldrar barna í Fossvogsskóla segja traust þeirra til Reykjavíkurborgar brostið í kjölfar upplýsinga- og aðgerðarleysis vegna myglu sem hefur fundist í skólanum. Foreldrar eru sumir hættir að senda börn sín í skólann.

Starfsfólk og nemendur í Fossvogsskóla kvörtuðu undan einkennum myglu árið 2019. Í framhaldinu voru tekin sýni og í ljós kom að skólinn var verr farinn af myglu en áður hafði verið talið.

Foreldrar sendu frá sér yfirlýsingu í gær þar sem þeir segja traustið brostið. Farið er fram á að fundin verði varanleg lausn og að rót vandans verði áfram leitað. Þá vilja þeir verið upplýstir um gang mála sem hafi hingað til ekki verið gert.

Fá engar upplýsingar

Jónína Margrét Sigurðardóttir, foreldri barns í Fossvogsskóla, vísar til svartrar skýrslu um stöðuna í skólanum þar sem fram kemur að varasamar sveppategundir hafi fundist. Skýrslan var gefin út í desember en birt síðastliðinn föstudag.

„Núna nýverið hafa fulltrúar borgarinnar, Skúli Helgason og Helgi Grímsson, komið í fréttum og talað um að þeir vilji hafa gott samtal og samstarf á milli borgarinnar og foreldra. En svo bara strax á föstudaginn er það rofið. Þá kom í rauninni fram þessar niðurstöður úr síðustu skýrslu og við foreldrar höfum enn ekki fengið neinar upplýsingar frá borginni um það,“ segir Jónína.

Mygla greindist í Fossvogsskóla í byrjun árs 2019. Farið hefur verið í miklar framkvæmdir sem hafa kostað í kringum 500 milljónir. Myglan er hins vegar enn að greinast. Vísir/Vilhelm

Barnið komið í heimakennslu

Jónína segir að foreldrar hafi ítrekað kallað eftir viðbrögðum.

„Í lengri tíma var ekki tekið mark á okkur, það var ekki hlustað. Mín tilfinning er sú að fólki sé bara sama.“

Sjálf vill hún ekki senda dóttur sína í skólann en hún fær félagsskapinn úti í frímínútum og annars staðar en inni í skólabyggingunni.

„Dóttir mín fer ekki í skólann. Þetta er á aðra viku sem hún fer ekki í skólahúsnæðið. Hún fer í frímínútur og leikfimi og sund,“ segir hún.

„Hún hefur fengið rosaleg höfuðverkjaköst, ég þurfti að sækja hana í skólann þar sem hún kastaði upp af verkjum, það hefur liðið yfir hana hérna heima af verkjum. Hún liggur í sófanum mikið algjörlega uppgefin af heilaþoku og fær verki í alla útlimi. Svona sem dæmi,“ segir Jónína, en fram að því hafði dóttir hennar verið heilsuhraust. Dóttir hennar er nú loks að jafna sig, eftir að hafa ekki mætt í skólann í um hálfan mánuð, að sögn Jónínu.

„Hún hefur núna orku til að leika sér, vera með vinum sínum. Vera hún.“

Rætt var við Jónínu Margréti í hádegisfréttum Bylgjunnar. Hlusta má á fréttatímann í spilaranum hér fyrir neðan. 


Tengdar fréttir

Þrífa á Fossvogsskóla sem aldrei fyrr

Náttúrufræðistofnun Íslands telur líklegt að umfangsmiklar framkvæmdir á liðnum misserum til að uppræta leka- og rakavandamál í Fossvogsskóla hafi borið árangur, m.a. með því að fjarlægja skemmt byggingarefni.

Ástand allra skólanna í borginni verði metið

Uppsöfnuð viðhaldsþörf í skólum Reykjavíkurborgar nam þremur milljörðum króna fyrir tveimur árum. Borgarfulltrúi Sjálfstæðisflokksins vill að nú verði farið í markvissa úttekt og endurskoðun á fjármálaáætlun borgarinnar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.