Yngsti Englendingurinn til að skora mark í Meistaradeildinni spilar líklegast fyrir þýska landsliðið

Yngsti enski leikmaðurinn til að skora í Meistaradeildinni spilar líklega fyrir þýska landsliðið

Jamal Musiala varð í gær yngsti enski leikmaðurinn sem skorar í Meistaradeildinni þegar hann skoraði í sigri Bayern München á ítalska liðinu Lazio. Englendingar eru samt líklega að missa af stráknum.

Jamal Musiala var aðeins 17 ára og 363 daga gamall í gær og sló með því met Alex Oxlade-Chamberlain sem var 18 ára og 44 daga þegar hann skoraði sitt fyrsta mark í Meistaradeildinni.

Það þykir nú ólíklegt að þessi efnilegi strákur spili fyrir enska landsliðið því Þjóðverjar ætla sér að ná honum í sitt landslið.

Musiala var ekki aðeins yngsti Englendingurinn til að skora í Meistaradeildinni heldur einnig yngsti leikmaður Bayern frá upphafi til að skora í keppninni.

Musiala getur valið úr landsliðum til að spila fyrir því hann gæti spilað fyrir England, Þýskaland og Nígeríu. Musiala fæddist í Þýskalandi. Faðir hans er bresk-nígerískur og móðir hans er þýsk.

Hann fluttist síðan ungur til Englands. Hann var í akademíu Chelsea en fór til Bayern í júlí 2019. Musiala hefur spilað með 15 ára, 16 ára, 17 ára og 21 árs landsliði Englendinga og með 16 ára landsliði Þýskalands.

England og Þýskaland eru bæði að fara spila leiki í undankeppni HM í næsta mánuði og ef að Musiala tekur þátt í þeim leikjum þá mun hann spila með því landsliði út ferilinn.

Þýski knattspyrnufræðingurinn Raphael Honigstein sagði frá því í Football Daily þættinum á BBC Radio 5 Live að Þjóðverjar ætli sér að tryggja sér þjónustu Jamal Musiala. Skilaboðin frá þeim eru skýr, þeir vilja fá hann í A-landsliðið strax.

„Hann þarf að taka stóra ákvörðun mjög fljótlega. England eða Þýskalandi. Það verður mikil barátta um hann. Samkvæmt fréttum frá Þýskaalandi þá eru Þjóðverjar í forystu í því kapphlaupi,“ sagði John Bennett á BBC World Service.

Það eru ekki að koma upp alltof margir öflugir leikmenn í Þýskalandi og það lítur út fyrir að þeir ætli að passa upp á það að missa ekki af Jamal Musiala. Það segir náttúrulega sýna sögu að hann var að fá að spila hjá hinu geysisterka Evrópumeistaraliði Bayern München og það í útsláttarkeppni Meistaradeildarinnar.

Meistaradeild Evrópu er á Stöð 2 Sport en upplýsingar um útsendingar má finna hér. Meistaradeildin er hluti af Stöð 2 Sport erlent sem kostar 3.990 krónur á mánuði en einnig má kaupa útsendingar sem stakan viðburð á 990 krónur.