Tónlist

Föstudagsplaylisti Sigtryggs Bergs

Hjalti Freyr Ragnarsson skrifar
Sigtryggur heldur sig við vínyl og CD.
Sigtryggur heldur sig við vínyl og CD. Sabine

Listamaðurinn Sigtryggur Berg Sigmarsson, sem hefur ekki lagt í að kaupa sér Spotify áskrift af ótta við að gefa þá efnislega miðla upp á bátinn, safnaði í lagalista úr fjarlægum afkimum veitunnar sænsku.

Hann myndar meðal annars tilraunatónlistardúóið Stilluppsteypu ásamt Helga Thorssyni, en þeir voru einnig báðir meðlimir rafglapasveitarinnar Evil Madness ásamt Jóhanni Jóhannssyni, DJ Musician og BJ Nilsen.

Sigtryggur býr út í Þýskalandi og starfar þar við myndlist sína og tónlist. Von er á nýrri sólóplötu frá honum eftir um tvær vikur. Platan heitir SHIP 2020 og er „afmælisplata“ fyrir fyrstu sólóplötu hans sem kom út árið 2001 og heitir SHIP. „[Platan] er semsagt ekki endurútgáfa af fyrstu plötunni heldur alveg nýtt efni sem tekur upp þráðinn þar sem SHIP endaði fyrir 20 árum.“

Sigtryggur er djúpkafari í tónlistargrúski sem og í kvikmyndaglápi, eins og meðlimir facebook-grúppu hans „Költ og gríðarlega undarlegar kvikmyndir“ þekkja. Fimm laganna sem hann gróf upp á Spotify reyndust til að mynda ekki vera til á miðlinum þegar uppi var staðið.

Eitt þeirra var til í þýskri koverútgáfu þó að orginalinn vantaði. „Hollywood Seven er upprunalega eftir Hollendinginn Alides Hidding sem svo Juliane Werding kóveraði með þýskum texta. Geggjað lag sem var korteri við það að verða hít en varð svo ekki. En gott að koverið hennar Juliane sé allavega á listanum,“ segir Sigtryggur.

Mikil Eydís er í listanum, meðal annars í formi ítaló diskós og járnkeðju leðurhetjurokks, en úrvalið er þó fjölbreytt. Hægt er að leggja við hlustir hér að neðan.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.