Fótbolti

Ingibjörg og norsku meistararnir úr leik eftir vítakeppni

Ingvi Þór Sæmundsson skrifar
Ingibjörg Sigurðardóttir skoraði úr sinni spyrnu í vítakeppninni.
Ingibjörg Sigurðardóttir skoraði úr sinni spyrnu í vítakeppninni. vísir/vilhelm

Ingibjörg Sigurðardóttir og stöllur hennar í Vålerenga eru úr leik í Meistaradeild Evrópu eftir tap fyrir Brøndby í vítaspyrnukeppni í 32-liða úrslitum keppninnar í dag.

Vegna kórónuveirufaraldursins mættust liðin aðeins einu sinni en ekki tvisvar og það á heimavelli Brøndby. Ingibjörg lék allan leikinn fyrir Vålerenga sem varð tvöfaldur meistari í Noregi á síðasta tímabili.

Norsku meistararnir komust yfir á 16. mínútu þegar Dejana Stefanovic skoraði úr vítaspyrnu. Staðan var 0-1 allt fram á 78. mínútu þegar Josefine Hasbo jafnaði fyrir Brøndby. Því þurfti að framlengja.

Liðunum tókst ekki að skora í framlengingunni og því var farið í vítaspyrnukeppni. Ingibjörg tók fyrstu spyrnu Vålerenga og skoraði úr henni.

Stefanovic klúðraði annarri spyrnu Vålerenga og reyndist það eina mislukkaða spyrnan í vítakeppninni sem Brøndby vann, 5-4.

Danska liðið er því komið sextán liða úrslit Meistaradeildarinnar. Dregið verður í þau á þriðjudaginn. Leikirnir í sextán liða úrslitunum fara fram 3. og 4. mars og 10. og 11. mars.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.